Xalq deputatlari Sharof Rashidov tuman Kengashining navbatdagi sessiyasida ko‘rib chiqilishi rejalashtirilgan “2026-yilning o‘tgan davri davomida tumanda «Yoshlarga oid davlat siyosati to‘g‘risida»gi Qonun ijrosi yuzasidan amalga oshirilgan ishlar to‘g‘risida”gi masala doirasida tuman Kengashi deputati E. Mirzayeva tomonidan Ziyokor mahallasida sessiya oldi o‘rganish ishlari olib borildi.
O‘rganish davomida mahalladagi yoshlar yetakchisining faoliyati, yoshlar bilan ishlash tizimining samaradorligi, ularning muammolarini aniqlash va hal etish borasida amalga oshirilayotgan ishlar tahlil qilindi. Shuningdek, yoshlarning bo‘sh vaqtini mazmunli tashkil etish, ularni sport, madaniyat va kitobxonlikka keng jalb qilish, iqtidorli yoshlarni qo‘llab-quvvatlash, yoshlar bandligini ta’minlash hamda tadbirkorlik tashabbuslarini rag‘batlantirish borasidagi faoliyatga e’tibor qaratildi.