Xalq deputatlari Zarbdor tuman Kengashiga 13-Adirobod saylov okrugidan saylangan deputat Sanobar Keldibekova tomonidan Adirobod mahallasida jamoat xavfsizligini ta’minlash hamda jinoyatchilikning oldini olish borasida amalga oshirilayotgan ishlar o‘rganildi.
O‘rganish jarayonida profilaktika inspektori faoliyati, hududdagi kriminogen vaziyat, huquqbuzarliklar profilaktikasi bo‘yicha amalga oshirilayotgan chora-tadbirlar hamda aholi bilan hamkorlikda olib borilayotgan ishlar tahlil qilindi.
Ma’lum qilinishicha, joriy yil boshidan bugungi kunga qadar Adirobod mahallasi hududida jinoyat holatlari qayd etilmagan bo‘lib, mahalla jinoyatchilik ko‘rsatkichlari bo‘yicha “yashil” toifada saqlanib kelmoqda.
Shuningdek, fuqarolar, ayniqsa yoshlar o‘rtasida huquqiy targ‘ibot ishlarini kuchaytirish, kiberjinoyatchilikning oldini olish, oilaviy nizolarni barvaqt aniqlash hamda profilaktik hisobda turuvchi shaxslar bilan manzilli ishlash yuzasidan olib borilayotgan ishlar bilan tanishildi.