Unda shahar Obodonlashtirish bo‘limining Yashil makon loyihasi doirasida 2026-yil birinchi chorak yakunlari bo‘yicha amalga oshirilgan ishlar yuzasidan hisoboti eshitildi.

Yig‘ilishni doimiy komissiya raisi o‘rinbosari M.Abdurahmonova ochdi va olib bordi. 

U o‘z kirish so‘zida ekologik barqarorlikni ta’minlash, yashil hududlarni kengaytirish va shahar muhitini yaxshilash bugungi kunning ustuvor vazifalaridan biri ekanini ta’kidladi.

Hisobotda qayd etilishicha, o‘tgan davr mobaynida shahar hududida ko‘chat ekish, yashil hududlarni kengaytirish, mavjud daraxtlarni parvarishlash hamda sug‘orish tizimlarini yaxshilash bo‘yicha qator ishlar amalga oshirilgan. Shuningdek, aholi punktlarida ekologik muhitni yaxshilashga qaratilgan manzilli chora-tadbirlar bosqichma-bosqich yo‘lga qo‘yilgani bildirildi.

Yig‘ilish davomida deputatlar tomonidan amalga oshirilgan ishlar samaradorligi, ekilgan ko‘chatlarning yashab qolish darajasi, ularning parvarishi va sug‘orish tizimining holati yuzasidan qator savollar o‘rtaga tashlandi. Ayniqsa, ishlarning sifati va natijadorligiga alohida e’tibor qaratildi.

Muhokamalar jarayonida ayrim kamchiliklar ham qayd etilib, ularni bartaraf etish bo‘yicha aniq taklif va tavsiyalar bildirildi. Xususan, ko‘chat ekish bilan bir qatorda ularning parvarishini tizimli yo‘lga qo‘yish, hududlar kesimida mas’uliyatni kuchaytirish hamda jamoatchilik nazoratini kengaytirish zarurligi ta’kidlandi.

Yig‘ilish yakunida doimiy komissiya tomonidan tegishli mas’ullarga aniqlangan kamchiliklarni bartaraf etish, amalga oshirilayotgan ishlar sifatini oshirish hamda “Yashil makon” loyihasi ijrosini yanada samarali tashkil etish bo‘yicha topshiriqlar berildi.