Yig‘ilish kun tartibidan o‘rin olgan asosiy masala— “Infratuzilma va ijtimoiy barqarorlik” jamg‘armasi mablag‘lari hisobidan I-guruh nogironligi bo‘lgan hamda oilasida mehnatga layoqatli a’zolari mavjud bo‘lmagan fuqarolar xonadonlarini energiya tejamkor, ya’ni “yashil” ta’mirlash ishlari bo‘ldi. 

Yig‘ilish davomida Inson ijtimoiy xizmatlari markazi rahbari I.Otajonov tomonidan bugungi kunga qadar amalga oshirilgan ishlar yuzasidan hisobot taqdim etildi. Unda ta’kidlanishicha, ajratilgan mablag‘lar doirasida bir qator xonadonlarda ta’mirlash ishlari olib borilgan, issiqlikni saqlovchi materiallardan foydalanish orqali uylarning energiya samaradorligi oshirilgan.

Shuningdek, obodonlashtirish bo‘limi mutasaddilari tomonidan bajarilgan ishlar, mavjud muammolar va ularni bartaraf etish bo‘yicha chora-tadbirlar yuzasidan ma’lumot berildi. Ayrim hududlarda ta’mirlash ishlarining sust borayotgani, qurilish materiallari yetkazib berishdagi uzilishlar hamda texnik nazorat masalalarida kamchiliklar borligi qayd etildi.

Deputatlar tomonidan bildirilgan fikr-mulohazalarda ajratilgan mablag‘lardan maqsadli va samarali foydalanish, ishlar sifatini oshirish hamda jarayon ustidan nazoratni kuchaytirish zarurligi alohida ta’kidlandi.

Yig‘ilish yakunida mas’ullarga aniqlangan kamchiliklarni bartaraf etish, ishlarni jadallashtirish hamda belgilangan vazifalarni o‘z vaqtida bajarish bo‘yicha tegishli topshiriqlar berildi.