Deputat ko‘magida ko‘cha yoritkichlar o‘rnatilib, yog‘och ustunlar almashtiriladigan bo‘ldi 

Xalq deputatlari Jomboy tumani Kengashi deputati Nodir Toʼraev 11-Gʼazira saylov okrugidagi saylovchilar bilan uchrashuv oʼtkazdi. Unda mahalla faollari, nuroniylar, xotin-qizlar va yoshlar ishtirok etdi.

Uchrashuv davomida fuqarolar tomonidan 30 ga yaqin murojaatlar qabul qilindi. Аyrim masalalar joyida ijobiy hal etilgan boʼlsa, qolganlari tegishli mutasaddi tashkilotlarga biriktirilib, ijrosi deputat nazoratiga olindi. Zarur hollarda deputatlik soʼrovlari chiqarilishi belgilandi.

Fuqaro Аbdulaziz Mardiev tomonidan mahalladagi ichki yoʼlni asfalьt qilish, yaroqsiz simyogʼoch ustunlarni almashtirish hamda oʼrnatilgan tungi yoritgichlar ishlamayotgani yuzasidan murojaat qilindi. Maʼlum boʼlishicha, ushbu yoritgichlar obodonlashtirish balansida boʼlsa-da, amalda yonayotgan emas. Murojaat yuzasidan tuman obodonlashtirish boʼlimi tomonidan koʼchaga quyosh energiyasida ishlaydigan yangi yoritkich oʼrnatish, tuman elektr korxonasi tomonidan esa 12 ta yaroqsiz simyogʼoch ustunni almashtirish belgilandi.

Shuningdek, Nodira Аhmedova Sariqipchoq mahallasiga keluvchi asosiy yoʼl taʼmirtalab ahvolga kelib qolganini bildirib, uni taʼmirlash masalasini koʼtardi. Ushbu yoʼl tuman avtoyoʼl korxonasi tomonidan bir hafta ichida taʼmirlab berilishi rejalashtirildi.

Аsqar Vahobov tomonidan Gʼazira mahallasining Doʼng qishlogʼidan Shakar qishlogʼigacha boʼlgan yoʼlni asfalьtlash taklifi ilgari surildi. Masala yuzasidan tuman obodonlashtirish boʼlimi tomonidan 2026 yilning ikkinchi yarim yilligida yoʼlni asfalьt qilish ishlari amalga oshirilishi maʼlum qilindi.

Shuningdek, kadastr masalalari, ichki yoʼllarni shagʼallashtirish, bolalar bogʼchasi qurish, transformatorlarni taʼmirlash, moddiy yordam va ichimlik suvi bilan bogʼliq muammolar koʼtarildi. Har bir murojaat tegishli tashkilotlar kesimida qayd etildi va ularning ijrosi ustidan doimiy nazorat oʼrnatilishi taʼkidlandi.

Shu kuni deputat Sariqipchoq mahallasida oʼtkazilgan “Mahallaning ishbilarmon ayoli” loyihasining saralash bosqichida ham ishtirok etdi. Ushbu tadbir “Ishbilarmon ayol” koʼrik-tanlovi doirasida tashkil etilib, mahallada faoliyat yuritayotgan tadbirkor xotin-qizlarni qoʼllab-quvvatlashga qaratildi.

Tadbirda tadbirkor Sabohat Korjaevaning faoliyati eʼtirof etildi. U oʼzining 8 sotix yer maydonida barpo etgan issiqxonasida 100 tupdan ziyod limon daraxtlari parvarishlab, yiliga ikki marotaba hosil olmoqda. Mavsum davomida limonariydan 100 million soʼmgacha daromad olishga erishmoqda. Shu bilan birga, mahalla xotin-qizlarini ish bilan taʼminlab, ularning bandligini oshirishga hissa qoʼshmoqda.

Аyni paytda tadbirkor qoʼshimcha issiqxona qurish va mandarin koʼchatlarini ekishni rejalashtirgan. Bu esa nafaqat oilaviy daromadni oshirish, balki mahallada yangi ish oʼrinlari yaratish imkonini ham beradi.

Uchrashuv va tadbirlar aholi muammolarini joyida hal etish, fuqarolar bilan ochiq muloqot oʼtkazish, xotin-qizlar tadbirkorligini ragʼbatlantirish yoʼlida muhim qadam boʼldi.