Xalıq deputatları Bozataw rayonlıq Keńesi sekretariatı baslıǵı, 1-sanlı «Palwash ataw» saylaw okruginen (ÓzMTDP) deputat A.Ibragimov hám 6-sanlı «Andjan» saylaw okruginen (ÓzXDP) deputat SH.Berdaxov rayonlıq Qánigelestirilgen mektepte boldı.
Deputatlardı mektep direktorınıń orınbasarı A.Ayımbetov kútip alıp, bilimlendiriw mákemesiniń ishki múmkinshilikleri, oqıwshılar ushın jaratılǵan sharayatlar hám olardıń oqıw-bilimdegi jetiskenlikleri menen tanıstırdı.
Ushırasıw dawamında mekteptegi bar bolǵan múmkinshiliklerden nátiyjeli paydalanıw, oqıwshılar ushın qolaylı sharayatlarni jáne de jaqsılaw máselelerine de itibar qaratıldı.
Deputatlar dáslep sport zalı sharayatların úyrendi.
Úyreniw dawamında deputatlar mektepte oqıwshılardıń dene-tárbiya hám sport penen shuǵıllanıwı ushın jaratılǵan sharayatlar menen tanıstı. Sport zalınıń ulıwma jaǵdayı, bar sport inventarları hám olardıń oqıwshılar ushın jetkilikliligi kózden ótkerildi.
Sonıń menen birge, oqıwshılardıń sportqa qızıǵıwshılıǵın arttırıw, salamat turmıs tárizin qáliplestiriw hám jaslardı sportqa keńnen tartıw baǵdarında alıp barılıp atırǵan jumıslarǵa itibar qaratıldı.
Úyreniwdiń tiykarǵı maqseti — oqıwshılar ushın qolaylı hám zamanagóy sport sharayatların jáne de jaqsılaw, bar mashqalalardı anıqlap, olardı saplastırıw boyınsha tiyisli usınıslar islep shıǵıwdan ibarat.
Qánigelestirilgen mektepte gúz-qıs máwsimine tayarlıq máseleleri kózden ótkerildi.
Rayondaǵı qánigelestirilgen mektepte gúzgi-qısqı máwsimge tayarlıq boyınsha alıp barılıp atırǵan jumıslarǵa deputatlar itibar qarattı.
Onda mekteptiń ısıtıw sisteması, oqıw bólmeleriniń ısıtılıwı, elektr tarmaqları, qıs máwsiminde paydalanılatuǵın qurılmalar hám qáwipsizlik ilajlarınıń jaǵdayı kózden ótkerildi.
Sonıń menen birge, suwıq máwsimde oqıwshılarǵa jıllı, qolaylı hám qáwipsiz sharayat jaratıw ushın alıp barılıwı zárúr bolǵan jumıslar belgilenip, anıqlanǵan máselelerdi óz waqtında saplastırıw boyınsha tiyisli usınıslar berildi.
Mektep kitapxanasındaǵı sharayatlar kórip shıǵıldı.
Bunnan soń mekteptiń kitapxanasındaǵı sharayatlar menen tanısıldı. Kitapxanadaǵı kitap fondı, oqıwshılar ushın jaratılǵan múmkinshilikler hám oqıw ushın ajıratılǵan sharayatlar kórip shıǵıldı.
Úyreniw dawamında oqıwshılardıń kitapqa bolǵan qızıǵıwshılıǵın jáne de arttırıw, kitapxana fondın jańa kórkem hám oqıw ádebiyatları menen bayıtıw, sonday-aq, oqıwshılar arasında kitap oqıwdı keńnen nasıyatlaw boyınsha birqatar usınıslar berildi.
Sonday-aq, kitapxanadan nátiyjeli paydalanıwdı jolǵa qoyıw hám oqıwshılardıń bos waqıtın mazmunlı ótkeriwine jaǵday jaratıw máselelerine itibar qaratıldı.