ЯНГИҚЎРҒОНГА КИРИШ ҚИСМИДА 2,3 КИЛОМЕТРЛИК ПИЁДАЛАР ЙЎЛАКЧАСИ БАРПО ЭТИЛМОҚДА
«Оғир туман» дастури доирасида Янгиқўрғон туманига кириш қисмида аҳоли ва меҳмонлар учун қулай ҳамда хавфсиз ҳаракатланиш шароитларини яратиш мақсадида кенг кўламли ободонлаштириш ишлари амалга оширилмоқда.
Хусусан, «BARAKOT-HIMMAT FAYZ» хусусий корхонаси томонидан қиймати 1 миллиард 460 миллион сўм бўлган лойиҳа асосида Чортоқ туманидан Янгиқўрғон туманига кириш қисмида 2,3 километр узунликдаги замонавий пиёдалар йўлакчаси барпо этилмоқда.
Шунингдек, пиёдаларнинг тунги вақтда хавфсиз ҳаракатланишини таъминлаш мақсадида йўлак бўйлаб қуёш энергиясида ишлайдиган 65 та замонавий ёритиш чироғи ўрнатилмоқда.
Туман ҳокими, халқ депутатлари Янгиқўрғон тумани Кенгаши депутати Нажмиддинов Асадулла Икромович мазкур объектда бўлиб, қурилиш ва ободонлаштириш ишларининг бориши, уларнинг сифати ҳамда белгиланган вазифалар ижросини кўздан кечирди.
Ўрганиш давомида масъулларга қурилиш ишларини белгиланган меъёрлар асосида сифатли ва ўз муддатида якунлаш, ҳудудни янада обод, кўркам ва замонавий қиёфага келтириш бўйича тегишли кўрсатмалар берилди.
Мазкур лойиҳанинг амалга оширилиши натижасида пиёдалар учун хавфсиз ҳаракатланиш имконияти яратилиб, туманга кириш ҳудудининг меъморий қиёфаси янада яхшиланади.