Bugungi globallashuv sharoitida tinchlik va barqarorlik masalasi barcha davlatlar uchun eng dolzarb vazifalardan biriga aylangan. Xalqaro ziddiyatlar, geosiyosiy qarama-qarshiliklar kuchayib borayotgan bir paytda Oʻzbekiston Respublikasi oʻz tashqi siyosatini
ochiqlik, muloqot va tinchlik tamoyillari asosida izchil olib bormoqda. 

Shveytsariyaning Davos shahrida boʻlib oʻtgan Tinchlik kengashi Nizomini imzolash marosimida Oʻzbekiston Respublikasi Prezidenti Shavkat Mirziyoyevning ishtiroki mamlakatimizning global tinchlikni mustahkamlash yoʻlidagi qatʼiy pozitsiyasini
yana bir bor namoyon etdi. 

Mazkur hujjat tinchlikni taʼminlash, mojarolarning oldini olish, davlatlar oʻrtasida oʻzaro ishonch va hamkorlikni kuchaytirishga qaratilgan muhim xalqaro tashabbusdir. Oʻzbekistonning ushbu jarayonda faol ishtiroki mamlakatimizning nafaqat mintaqaviy, balki global miqyosdagi masʼuliyatli davlat sifatidagi nufuzini yanada oshirmoqda. 

Soʻnggi yillarda Prezidentimiz rahbarligida Oʻzbekiston Markaziy Osiyoda yaxshi qoʻshnichilik, oʻzaro hurmat va pragmatik hamkorlik muhitini shakllantirishga erishdi. Davosdagi ushbu tashabbus ana shu siyosatning mantiqiy davomi boʻlib,
tinchlik-Oʻzbekiston tashqi siyosatining asosiy ustuvor yoʻnalishi ekanini tasdiqlaydi. 

Deputat sifatida shuni alohida taʼkidlashni istardimki, tinchlik va barqarorliksiz taraqqiyot boʻlishi mumkin emas. Xalqaro maydonda tinchlikparvar tashabbuslarni qoʻllab-quvvatlash orqali Oʻzbekiston, avvalo, oʻz fuqarolarining farovon kelajagi, yosh avlodning tinch va osoyishta hayoti uchun mustahkam poydevor yaratmoqda. 

Bugun Oʻzbekiston dunyoga urush emas, muloqot; qarama-qarshilik emas, hamkorlik; zoʻravonlik emas, tinchlik tarafdori ekanini amaliy harakatlari bilan isbotlamoqda. Bu esa milliy manfaatlarimizga toʻliq mos keladigan, uzoq muddatli va oqilona siyosatdir.

O'.Akkulov
Zomin tuman Kengashi deputati