1991-yil 18-noyabr kuni O‘zbekiston Respublikasi Oliy Kengashining o‘n birinchi sessiyasida “O‘zbekiston Respublikasining Davlat bayrog‘i to‘g‘risida”gi Qonun qabul qilindi. Shu tariqa, mustaqil O‘zbekistonning yangi bayrog‘i rasman tasdiqlandi va o‘z kuchiga kirdi.

Bu bayroq xalqimizning asrlar davomida shakllangan madaniyati, ruhiyati, umidlari va milliy an’analarini mujassam etadi. Mustaqillik timsoli bo‘lgan bu ramz bugun nafaqat O‘zbekistonda, balki butun dunyoning turli burchaklarida – xalqaro tashkilotlar, diplomatik vakolatxonalar, sport maydonlari va keng ko‘lamli tadbirlarda baland ko‘tarilmoqda.

Bugungi kunning ahamiyati

18-noyabr yurtimizda keng nishonlanib, maktablar, oliy ta’lim muassasalari, davlat idoralari va jamoat tashkilotlarida bayram tadbirlari o‘tkaziladi. Yoshlar orasida bayroqni qadrlash, hurmat qilish va uni yurt ravnaqi bilan bog‘lashga qaratilgan ma’naviy-ma’rifiy tadbirlar tashkil etiladi.

Bugun O‘zbekiston bayrog‘i dunyoning ko‘plab davlatlarida baland ko‘tarilmoqda. Sportchilarimiz yutuqlari orqali butun dunyoda hilpirayotgan bayrog‘imiz xalqimizning iftixori, g‘ururi va birligi ramzidir.

18-noyabr – O‘zbekiston Bayrog‘i kuni nafaqat tarixiy sana, balki xalqimizning mustaqillik yo‘lidagi qat’iyati va ozodlikka bo‘lgan intilishining yorqin timsolidir. Bayrog‘imizni hurmat qilish – Vatan, xalq va davlat mustaqilligini hurmat qilish demakdir. Bugungi kunda mustaqil O‘zbekistonning bayrog‘i milliy g‘urur, birlik va yuksalish ramzi sifatida har bir yurtdoshimiz qalbida chuqur o‘rin olgan.

Xalq deputatlari Urganch shahar Kengashi deputati R.Baltayev