Xalq deputatlari tuman Kengashi deputati B.Avliyоqulov Mingbuloq mahallasida qurilishi boshlangan lotoklarning qurilish jarayonlari bilan tanishdi. O‘rganish davomida qurilish ishlarining borishi, ularning sifatli bajarilishi hamda aholining suv ta’minotini yaxshilash masalalariga e’tibor qaratildi. Mazkur lotoklarning qurilishi aholi tomorqalarini o‘z vaqtida sug‘orish, suv resurslaridan oqilona va tejamkor foydalanish hamda suv isrofgarchiligining oldini olishda muhim ahamiyat kasb etadi. Suv yetkazib berish tizimini yaxshilash orqali tomorqalardan samarali foydalanish, ekinlar hosildorligini oshirish va aholi farovonligini yuksaltirishga xizmat qilishi kutilmoqda. Deputatlik nazorati doirasida bunday qurilish ishlarining sifatli va belgilangan talablar asosida amalga oshirilishi muhim hisoblanadi.