Bolalar uchun xavfsiz va qulay muhit yaratish, ularning huquq va qonuniy manfaatlarini ta’minlash davlat siyosatining muhim yo‘nalishlaridan biridir. Shu nuqtayi nazardan, mahallalarda bolalar uchun yaratilgan sharoitlarni joyiga chiqqan holda o‘rganish deputatlik nazoratining muhim yo‘nalishlaridan biri bo‘lib qolmoqda.

O‘zbekiston Respublikasining 2008-yil 7-yanvardagi O‘RQ–139-son “Bola huquqlarining kafolatlari to‘g‘risida”gi Qonunida bolaning hayoti, sog‘lig‘i, sha’ni va qadr-qimmatini himoya qilish, uning har tomonlama kamol topishi uchun zarur shart-sharoitlarni yaratish davlat siyosatining ustuvor vazifalari sifatida belgilangan.

Mazkur qonun ijrosini joylarda o‘rganish, shuningdek, O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi doirasida Xalq deputatlari Marg‘ilon shahar Kengashi raisi O.Axmatshayev, 15-Zuhro saylov okrugi deputati A.Ermatov va deputatga biriktirilgan kotibiyat bosh mutaxassisi Z.Yakubova va “Ijtimoiy soha, yoshlar siyosati, madaniyat va sport masalalari bo‘yicha” doimiy komissiyasi a’zosi S.Azizov, Zuhro mahallasi raisi B.Soliyeva hamda mahalla faollari ishtirokida hududdagi bolalar maydonchalari ko‘zdan kechirildi.

O‘rganish davomida bolalar maydonchalarining amaldagi holati, ularning bolalar uchun xavfsizligi, bo‘sh vaqtni mazmunli o‘tkazish va hordiq chiqarish uchun yaratilgan sharoitlar tahlil qilindi.

Joyiga chiqib o‘rganish jarayonida, xususan, 49-ko‘p qavatli uy oldidagi bolalar maydonchasida mavjud sharoitlar yetarli darajada emasligi aniqlandi. Mazkur holat bolalarning xavfsiz va qulay muhitda dam olishi uchun zarur sharoitlarni yaxshilash lozimligini ko‘rsatdi.

Bu yerda masala faqat maydonchadagi mavjud jihozlar bilan cheklanmaydi. Bolalar foydalanadigan hududlarning xavfsizligi, obodonlashtirilganligi va amaldagi ehtiyojlarga mosligi muntazam nazorat qilib borilishi zarur. Shu bois aniqlangan muammoni bartaraf etish masalasi deputatlik nazoratiga olindi.

O‘rganish yakunlari bo‘yicha bolalar maydonchasidagi mavjud kamchiliklarni bartaraf etish, hududni tartibga keltirish va bolalar uchun zarur sharoitlarni yaxshilash yuzasidan tegishli choralarni ko‘rish belgilandi.

Deputatlik nazoratining mazkur shakli qonun talablarining joylardagi ijrosini baholash bilan birga, aholi kundalik hayotida sezilayotgan muammolarni aniqlash va ularning amaliy yechimini ta’minlashga qaratilgani bilan ahamiyatlidir. Ayniqsa, bolalar foydalanadigan infratuzilma obyektlarida xavfsizlik va qulaylik masalalari doimiy e’tiborda bo‘lishi lozim.