Xalq deputatlari Marg‘ilon shahar Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasi tomonidan qonun hujjatlari ijrosini joyiga chiqqan holda o‘rganish, aniqlangan masalalarni tahlil qilish va ularning amaliy yechimini ta’minlashga qaratilgan nazorat tadbirlari davom ettirilmoqda.

Navbatdagi o‘rganish komissiya raisi X.Abdurahmonov, komissiya a’zosi G‘.Madumarov hamda deputat R.Alijonova ishtirokida Marg‘ilon shahridagi 18-sonli umumiy o‘rta ta’lim maktabida olib borildi.

Unda, xususan, O‘zbekiston Respublikasining 1995-yil 21-dekabrdagi 167-I-son Qonuni bilan yangi tahrirda tasdiqlangan “Davlat tili haqida”gi Qonun talablarining ta’lim muassasasidagi ijrosi o‘rganildi.

Davlat tili to‘g‘risidagi qonunchilik talablarida ta’lim jarayonida davlat tilidan foydalanish, ish yuritish va hujjatlarni davlat tilida rasmiylashtirish, davlat tilining amaliy qo‘llanishini ta’minlash bilan bog‘liq qator vazifalar belgilangan.

O‘rganish davomida maktabda ish yuritish va rasmiy hujjatlarning davlat tilida yuritilishi, ko‘rgazmali axborotlar hamda ta’lim jarayonida davlat tilidan foydalanish holatiga e’tibor qaratildi.

Shuningdek, davlat tilining nufuzini oshirish, o‘quvchilarning ona tiliga hurmat ruhida tarbiyalanishini ta’minlash, o‘zbek adabiy tilining amaldagi me’yorlariga rioya etish hamda ta’lim muassasasida til madaniyatini yuksaltirish masalalari muhokama qilindi.

Joyiga chiqib o‘rganish davomida qonun talablarining amaliy ijrosiga alohida e’tibor qaratilib, mavjud holat yuzasidan mas’ullarga tegishli tavsiya va ko‘rsatmalar berildi.

Doimiy komissiya tomonidan qonun hujjatlarining ta’lim muassasalarida amalda qanday bajarilayotganini muntazam o‘rganib borish, aniqlangan kamchiliklarni bartaraf etish hamda ijro intizomini kuchaytirish masalalari deputatlik nazoratida bo‘lishi qayd etildi.

Bunday o‘rganishlar qonun talablarining qog‘ozdagi ijrosi bilan cheklanib qolmasdan, ularning kundalik faoliyatda amaliy ta’minlanishiga e’tibor qaratish, mas’ullarning javobgarligini oshirish va ta’lim muassasalarida davlat tilidan to‘g‘ri va samarali foydalanish uchun zarur sharoitlarni mustahkamlashga xizmat qiladi.