O‘ZBEK ALIFBOSINI TAKOMILLASHTIRISH BO‘YICHA MUHIM O‘ZGARISHLAR MUHOKAMA QILINDI 1-son Namangan Abu Ali ibn Sino nomidagi jamoat salomatligi texnikumida o‘zbek tilining lotin yozuviga asoslangan alifbosini takomillashtirish bo‘yicha amalga oshirilayotgan yangilanishlar mazmun-mohiyatiga bag‘ishlangan tadbir o‘tkazildi.


Tadbirda Namangan viloyati hokimining ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi I. Qo‘chqarova, Xalq deputatlari Namangan shahar Kengashi kotibiyati mudiri N. Ubaydullayev hamda Namangan shahar hokimining ma’naviyat va davlat tili masalalari bo‘yicha maslahatchisi A. Abdullayev ishtirok etdi.

Unda o‘zbek tilining lotin yozuviga asoslangan alifbosini takomillashtirishga qaratilgan qonun loyihasida nazarda tutilayotgan o‘zgarishlar haqida batafsil ma’lumot berildi.

Xususan, amaldagi 26 ta harf va 3 ta harf birikmasidan iborat alifboni 28 ta mustaqil harf hamda 1 ta tutuq belgisidan iborat shaklga takomillashtirish taklif etilayotgani ta’kidlandi.

Shuningdek, ikki belgidan iborat ayrim harf birikmalarini bitta harf bilan ifodalash nazarda tutilayotgani tushuntirildi:

🔹 G‘ g‘ → Ğ ğ
🔹 O‘ o‘ → Ö ö
🔹 Sh sh → Ş ş
🔹 Ch ch → Ç ç

Bundan tashqari, “Ng ng” harf birikmasidan voz kechish taklif etilayotgani qayd etildi.

Tadbir davomida mazkur o‘zgarishlarning ta’lim jarayoni, davlat tilida ish yuritish, hujjatlarni rasmiylashtirish hamda kundalik yozuv amaliyotidagi ahamiyati yuzasidan fikr almashildi.

Muhim jihat: mazkur o‘zgarishlar qonun loyihasida nazarda tutilgan bo‘lib, qonun loyihasining qabul qilinishi hamda uning amaliyotga joriy etilishi qonunchilikda belgilangan tartibda amalga oshiriladi.

Shu bois mavjud hujjatlarni darhol yangi shaklga almashtirish talabi yuzaga kelmaydi.

Tadbir ishtirokchilariga alifbodagi yangilanishlarning mazmun-mohiyatini to‘g‘ri anglash, ularni ta’lim va ish yuritish jarayonlarida qonunchilikda belgilangan tartib asosida qo‘llash yuzasidan tegishli tushuntirishlar berildi.

🟦🟦🟦🟦🟦🟦