KURASHXONA” SUV INSHOOTINING QUVVATI 100 MING KUB METRGACHA OSHIRILADI

Xalq deputatlari Namangan shahar Kengashi deputati, Namangan shahar hokimi A. Kamalov “Namangan viloyatining ichimlik va oqava suv tizimini modernizatsiya qilish” loyihasi doirasida amalga oshirilayotgan ishlar bilan tanishish maqsadida shaharning asosiy ichimlik suvi manbalaridan biri bo‘lgan “Kurashxona” suv tozalash va uzatish inshootida bo‘ldi.

Yevropa tiklanish va taraqqiyot banki ishtirokida amalga oshirilayotgan, umumiy qiymati 16,9 million AQSh dollarini tashkil etuvchi loyiha doirasida “Kurashxona” suv inshootini rekonstruksiya qilish ishlari izchil olib borilmoqda.

Loyiha doirasida 9 ta zamonaviy nasos agregati, sutkasiga 100 ming kub metr quvvatga ega suvni tindirish va filtrlash inshooti, reagent xo‘jaligi, dispetcherlik hamda markaziy laboratoriya binosi barpo etilmoqda.

Shuningdek, 2 ta 5 ming kub metrli va 1 ta 10 ming kub metrli toza suv rezervuari rekonstruksiya qilinmoqda. Loyiha yakunlangach, inshootning suv tozalash quvvati sutkasiga 38 ming kub metrdan 100 ming kub metrgacha oshirilishi ko‘zda tutilgan.

Mazkur ishlar natijasida suvning loyqaligi yuqori bo‘lgan holatlarda ham uni sifatli tozalash imkoniyati kengayib, 600 ming nafargacha aholini uzluksiz va sifatli ichimlik suvi bilan ta’minlash imkoniyati yaratilishi ko‘zda tutilmoqda.

O‘rganish davomida qurilish-montaj ishlarini belgilangan muddatlarda va sifatli yakunlash, loyihada nazarda tutilgan texnik talablarning bajarilishini ta’minlash hamda aholini sifatli ichimlik suvi bilan uzluksiz ta’minlash masalalariga alohida e’tibor qaratildi.

Mas’ullarga aniqlangan masalalar yuzasidan tegishli topshiriq va tavsiyalar berildi.

O‘rganish jarayonida Kengashning doimiy komissiyalari kesimidagi qonunlar taqsimotidan “Ichimlik suvi ta’minoti va oqova suvlarni chiqarib yuborish to‘g‘risida”gi O‘zbekiston Respublikasi Qonuni, O‘RQ-784-son, 2022-yil 22-iyul, hamda sohaga oid boshqa qonunchilik hujjatlari talablari o‘rganildi.

O‘rganish yakunida ichimlik suvi ta’minoti tizimini modernizatsiya qilish, amalga oshirilayotgan rekonstruksiya ishlarining sifatli bajarilishini ta’minlash hamda aholini ichimlik suvi bilan barqaror ta’minlash bo‘yicha ishlarni doimiy nazorat qilib borish yuzasidan tegishli vazifalar belgilandi.