МАҲАЛЛА ЕТТИЛИГИ ФАОЛИЯТИ ВА 209-СОНЛИ ФАРМОН ИЖРОСИ ЎРГАНИЛДИ
Халқ депутатлари Янгиқўрғон тумани Кенгаши котибиятининг тасдиқланган иш режасига асосан, Кенгаш котибияти мудири Эргашева Мунисхон Рустамбековна 24-Нурафшон сайлов округидаги Гайистон маҳалласида бўлиб, маҳалла еттилиги фаолияти ҳамда 209-сонли Фармон ижроси доирасида амалга оширилаётган ишларни ўрганди.
Ўрганиш жараёнида маҳаллада аҳоли билан манзилли ишлаш, хонадонларнинг ижтимоий-иқтисодий ҳолатини хатловдан ўтказиш, аниқланган муаммоларни тегишли ташкилотлар билан ҳамкорликда ҳал этиш ва фуқаролар мурожаатларининг ижросини таъминлаш борасида олиб борилаётган ишлар атрофлича таҳлил қилинди.
Шунингдек, ишсиз фуқароларни доимий ва мавсумий иш ўринларига жойлаштириш, касб-ҳунар ва тадбиркорликка йўналтириш, оилавий даромад манбаларини кўпайтириш, аҳолининг томорқа ерларидан самарали фойдаланишини ташкил этиш ҳамда эҳтиёжманд оилаларга ижтимоий кўмак кўрсатиш масалаларига алоҳида эътибор қаратилди.
Маҳалла еттилиги аъзоларининг ўз вазифалари бўйича амалга оширган ишлари, фуқаролар билан ўтказилган учрашувлар, хонадонбай ўрганишлар натижалари, мурожаатларнинг йўналишлари ва уларнинг ҳал этилиш ҳолати муҳокама қилинди. Ҳар бир аниқланган масала бўйича масъуллар белгилаб олингани ва мурожаатлар ижроси устидан назорат ўрнатилгани кўриб чиқилди.
Ўрганиш давомида маҳалладаги ижтимоий ҳимояга муҳтож, кам таъминланган, боқувчисини йўқотган ва алоҳида эътибор талаб этадиган оилалар билан олиб борилаётган манзилли ишлар ҳам таҳлил қилинди. Уларнинг эҳтиёжларини тўғри аниқлаш, мавжуд имконият ва давлат кўмагидан самарали фойдаланишини таъминлаш бўйича маҳалла еттилиги аъзоларига тегишли тавсиялар берилди.
Бундан ташқари, ҳудудда ободонлаштириш ва санитария ҳолатини яхшилаш, ички йўллар, электр энергияси, ичимлик суви, чиқинди ташиш ҳамда бошқа инфратузилма масалалари юзасидан аҳоли томонидан билдирилган таклиф ва мурожаатлар ўрганилди. Ҳал этилиши қўшимча вақт ва маблағ талаб қиладиган масалаларни мутасадди ташкилотларга йўналтириш ҳамда уларнинг ижросини депутатлик ва жамоатчилик назоратига олиш зарурлиги таъкидланди.
Ўрганиш якунида маҳалла еттилигининг ўзаро ҳамкорлигини янада кучайтириш, ҳар бир хонадоннинг муаммосига индивидуал ёндашиш, фуқаролар мурожаатларини ўз вақтида ва қонуний ҳал этиш, ижро интизомига қатъий риоя қилиш ҳамда амалга оширилган ишлар натижадорлигини ошириш бўйича вазифалар белгилаб берилди.