Xalq deputatlari Jondor tumani Kengashiga 23-Ko‘liyon saylov okrugidan saylangan deputat U.Ro‘ziyev hamda tuman Kengashi kotibiyati mudiri I.Xolov va bosh mutaxassis R.Murodovlar birgalikda “Ko‘liyon” mahallasi hududida joylashgan 20-oilaviy poliklinika faoliyatini o‘rgandilar.
✔️O‘rganish jarayonida 21140 nafar aholiga xizmat ko‘rsatuvchi poliklinikada, aholiga ko‘rsatilayotgan tibbiy xizmat sifati, shifokorlar va o‘rta tibbiyot xodimlarining faoliyati, dori-darmon ta’minoti hamda bemorlar uchun yaratilgan shart-sharoitlar ko‘zdan kechirildi. Shuningdek, fuqarolarning tibbiy xizmatdan rozilik darajasi va mavjud muammolar yuzasidan fikr-mulohazalari tinglandi.
✔️Mutasaddilar tomonidan aholiga o‘z vaqtida va sifatli tibbiy yordam ko‘rsatish, ayniqsa, profilaktik tibbiy ko‘riklarni tizimli tashkil etish, onalar va bolalar salomatligini muhofaza qilish, surunkali kasalliklarni erta aniqlash masalalariga alohida e’tibor qaratildi.
✔️O‘rganish davomida aniqlangan ayrim kamchiliklar yuzasidan mas’ullarga tegishli tavsiya va topshiriqlar berildi. Shu bilan birga, tibbiyot muassasasida xizmat sifatini yanada yaxshilash va aholiga qulay shart-sharoitlar yaratish bo‘yicha takliflar bildirildi.
✔️Bunday o‘rganishlar aholining tibbiy xizmatdan mamnunligini oshirish, soha faoliyati ustidan deputatlik nazoratini kuchaytirish hamda joylardagi muammolarni o‘z vaqtida bartaraf etishda muhim ahamiyat kasb etadi.