BASLAMALÍ BYUDJET-XALÍQ MÁPI USHÍN XÍZMET ETIWSHI  BIRDEN-BIR REFORMA

        Búgingi kúnde mámleketimizde alıp barılıp atırǵan keń kólemli reformalar insan qádiri, xalıq mápi  hám aymaqlardıń rawajlanıwına qaratılǵan bolıp, turmısımızda ayırıqsha áhmiyetke iye bolmaqta.
   Ásirese, “Baslamalı byudjet”  sisteması puqaralardıń óz aymaqlarındaǵı mashqalalardı saplastırıwda tikkeley ózleri qatnasıp, pikir hám usınıslarınıń sheshimin tabıwına sebep bolmaqta.
    Qaraózek rayonı “Mádeniyat” awıl puqaralar jıyınında jasawshı puqaralar mine usı imkaniyattan utımlı paydalanıp, birgelikte bir-birewge húrmet izzet kórsetken halda dawıs toplaw arqalı máhálledegi mashqalalardı izbe-izlikte saplastırıwǵa, aymaqtıń social-ekonomikalıq rawajlanıwında belsendilik penen qatnasıp kelmekte. Búgingi kúnde usı aymaqtıń eń shetki awılların rayon orayına shekem tutastırıwshı oraylıq jolǵa qara qaplamalı asfalt jatqızıw jumısları nátiyjeli juwmaqlanıp, bul ámeliy isler awıl puqaralarınıń awızbirshiliginiń, belsendiliginiń ayqın dálili sıpatında kózge taslanadı.
     Burınları shetki aymaqlarda ishki jol, ishimlik suwı, elektr energiyası, sociallıq obektlerdi zamanagóy usıllarda  remontlaw sıyaqlı mashqalalar hám múrájátler uzaq waqıt talap etetuǵın bolsa, búgingi kúnde baslamalı byudjet joybarı arqalı puqaralar ózleri ushın  eń zárúr dep bilgen mashqalaların alıp shıǵıp, olardı ámelge asırıw imkaniyatına iye boldı. Bul joybar xalıqtı “Birlik bar jerde - bereket bar” degen naqıldıń  tumıslıq haqıyqat ekenligin kórsetedi.
     Mámleketimizde alıp barılıp atırǵan reformalardıń tiykarǵı maqseti - xalıqtıń turmıs abadanlıǵın asırıw, shetki aymaqlardı abat máhállege aylandırıw hám puqaralardıń turmıstan razı bolıp jasawın támiyinlewden ibarat. Jańa tegis jollar, zamanagóy mektepler, medicina mákemeleri, ishimlik suwı taqmaqları, jasıl qaplamalı sport maydanshalarınıń qurılıwı mine usınday reformalardıń nátiyjesi.
    Baslamalı byudjettiń eń úlken jetiskenligi sonda , ol adamlardı bir maqset jolında birlestiredi. Máhállede jasawshı xalıq bir-birine járdem beredi, birgelikte  háreket etedi hám jaslardı mehir-aqıbetli bolıwǵa, óz-ara húrmet-izzet, watansúyiwshilik  tuyǵıların qáliplestirip,  xalıq mápin óziniń jeke mápinen ústin qoyıwǵa tárbiyalaydı.
    Álbette usı sıyaqlı teńsiz nátiyjelerge erisiwde máhálle baslıǵınıń da xalıq iygiligi jolında alıp barıp atırǵan jumıslarınıń nátiyjesi óz kórinisin beredi.
    Solay eken baslamalı byudjet – bul xalıq penen mámleket  birliginiń ájayıp úlgisi, insan máplerin qorǵawǵa qaratılǵan áhmiyetli sistema desek asıra aytqan bolmaymız.                                          
SAYÍMOVA Sarsengul Alpısbaevna,
          Xalıq deputatları Qaraózek rayonlıq Keńesi 14-“Berdaq” saylaw okruginen deputat, «Adolat» social-demokratiyalıq partiyası deputatlıq toparı aǵzası