Usı jıldıń 24-fevral kúni Prezidentimizdiń jaslar menen ushırasıwı bolıp ótti hám bul ushırasıwda keleshek iyeleriniń mámleket rawajlanıwınıń oǵada úlken ekonomikalıq, sociallıq hám siyasiy kúshi ekenligi ayrıqsha atap ótildi.

Bul ushırasıw jaslarımız ushın, olardıń keleshegi ushın úlken burılıs bolatuǵınınan derek dep ayta alaman. Óytkeni bul ushırasıwda jaslarǵa tiyisli áhmiyetli baǵdarlar boyınsha bir qansha máseleler alga súrildi. Hár háptenin piyshembi kúnin “Jaslar kúni” dep belgilep, barlıq ministrlikler, hákimiyat basshıları mektep hám texnikumlarǵa barıp jaslar menen sáwbetlesiwler ótkeredi, olarda anıqlanǵan mashqalalardı sheshiwde járdemler beredi, -dep atap ótti.

Jaslar isbilermenligin qollap-quwatlawda 200 mln dollar pul ajıratılatuǵınlıǵı, “Keleshek isbilermeni” baǵdarlamasına tiykar jas isbilermenlerge 7 jılǵa 15 % ten kredit beriletuǵınlıgı, isbilermenligin keńeyttirmekshi bolǵanlarǵa bolsa 2 milliyard sumga deyin, al 6 pitkeriwshini jumısqa alǵan isbilermenge 10 milliyard sumǵa deyin kredit ajıratılatuǵınlıǵı, “Menin birinshi kásibim” baǵdarlamasına tiykar joqarı oqıw ornın pitkeriwshilerge ayına 2 million sumǵa deyin stipendiya beriletuǵınlıǵı balgilendi.

Endi Kommerciyalıq bankler 50 mıń jasqa biznes reje tayarlap beredi hám 20 mıń jastı isbilermenlikke oqıtadı. Texnikum oqıwshıları ushın “Work and travel” baǵdarlaması arqalı sırt ellerde islew imkaniyatı jaratılatuǵınlıǵı da belgilendi. “Oqıw orayları awqamı” shólkemlestirilip, hár bir rayonǵa 500 milion sumǵa deyin ssuda ajıratılıp, texnikum hám oqıw oraylarında kásip-óner laboratoriyasın shólkemlestiriletuǵınlıǵı, jas shańaraqlar ushın úy-jay ipoteka krediti stavkasınıń 14 % den asqan bólimi mámleketlik byudjeti esabınan qaplap beriletuǵınlıǵı, “Kitapqumarlıq mádeniyatın rawajlandırıw” qorı arqalı ónerli jaslarımızǵa 20 mln sumnan naqlay tólenetuǵınlıǵı, mekteplerdegi eń belsendi kitapqumar jaslarǵa 10 mln sumnan beriletuǵın bolsa, “Ekinshi imkan” joybarı arqalı jazanı ótep bolǵan jaslar zamanagóy IT, kásip hám xalıqaralıq tillerdi úyreniwde biypul oqıtılatuǵınlıqları, sonday-aq, basqada tarawlarda járdemler beriletuǵınlıǵı keleshek iyeleriniń turmısında jańa ózgerisler, jańalanıwlardı baslap beredi dep oylayman.

Ulıwmalastırıp aytqanda jaslardıń baslama hám ideyaların qollap-quwatlaw, innovaciyalıq joybar hám startaplarına ámeliy járdemlar beriw arqalı jaslardı jumıslı hám turaqlı dáramatlı etiw, olardıń jámiyette óz ornın tabıwına sharayat jaratıp beriw baslı wazıypalarımızdan biri ekenligi atap ótildi hám mámleketlik siyasattıń tiykarǵı baǵdarlarınan biri ekenligi túsindirildi.

Húrmetli Prezidentimizdizdiń keleshek jaslarǵa degen bunday úlken iseniminiń tiykarında el párawanlıǵı tur álbette. Hámme ellerde de jaslar usılay qádirleneme ?! ... Joq, álbette. Bunı túsingen jaslarımız ózlerinin bilimin, kúsh-jigerin, turmıslıq tájiriybelerin elimizdiń rawajlanıwı jolında bunnan aqılǵa say jumsaw arqalı juwap beredi dep oylayman.

R.Karmisova - Xalıq deputatları Qaraózek rayonlıq Keńesi 7-Shayxanakópir okrugi deputatı, Sociallıq taraw, jaslar siyasatı, mádeniyat hám sport máseleleri boyınsha turaqlı komissiya baslıǵı.