Ózbekstan Respublikası Prezidenti Shavkat Mirziyoyevtıń Qaraqalpaqstan Respublikasın sociallıq-ekonomikalıq rawajlandırıw baǵdarında bir qansha párman, qararları menen xalqımız párawan turmısın támiyinlewge tiyisli wazıypalar belgilep berilmekte. Usınday qarardıń jáne biri 2026-jıl 21-fevral kúni "Qaraqalpaqstan Respublikasın 2026-jılda sociallıq-ekonomikalıq rawajlandırıw hám kelesi jıllarǵa mólsherlengen baǵdarlamalardı tastıyıqlaw haqqında"ǵı 70-sanlı qararı qabıl etildi.

Qararǵa muwapıq Qaraqalpaqstan Respublikasın turaqlı sociallıq-ekonomikalıq rawajlandırıwdıń tiykarǵı maqsetleri belgilendi. Atap aytqanda, aymaqlıq ónim kólemin 8,1 procentke, sanaat ónimlerin islep shıǵarıw kólemin 8 procentke arttırıw, tikkeley sırt el investiciyaları kólemin 3,5 milliard AQSh dollarına jetkeriw hám jumıssızlıq dárejesin 4,2 procentke shekem, kámbaǵallıq dárejesin 3,2 procentke shekem azaytıw, Nókis qalası, Qońırat hám Shımbay rayonları jáne 109 máhálleni jumıssızlıq hám kámbaǵallıqtan awlaq aymaqqa aylandırıw baǵdarında bir qatar tapsırmalar belgilendi. Awır kategoriyadaǵı Bozataw, Qanlıkól, Moynaq hám Shomanay rayonlarında jáne kámbaǵallıq dárejesi joqarı bolǵan 90 máhállede isbilermenlikti rawajlandırıw hám infrastrukturanı jaqsılaw arqalı kámbaǵallıq dárejesin eki esege qısqartıw belgilendi. Qaraqalpaqstan Respublikasın turaqlı sociallıq-ekonomikalıq rawajlandırıw maqsetinde 2030-jılǵa shekem eksport kólemin 900 million AQSh dollarına jetkeriw hám elatlı punktlerdiń oraylasqan ishimlik suwı támiynatın 83,5 procentke jetkeriw belgilendi.

Sonday-aq, Qaraqalpaqstan Respublikası Ministrler Keńesi Baslıǵınıń jaylawlardan nátiyjeli paydalanıwdı shólkemlestiriw, sharwa ot-jem bazasın bekkemlew hám sharwashılıqtı rawajlandırıw máseleleri boyınsha birinshi orınbasarı lawazımı engizildi. Onıń tiykarǵı wazıypaları etip jaylaw hám shól aymaqlarında klimatqa say sharwashılıq ot-jem eginleri, dárilik hám pripravalar tuqımların egiw, eksportqa jaramlı ósimlikler jetistiriwdi jolǵa qoyıw arqalı aymaqlarda sharwashılıq, túyeshilik, qusshılıq hám qoyanshılıqtı rawajlandırıw boyınsha perspektivalı joybarlardı ámelge asırıw belgilengen.

2026-jıldıń aqırına shekem Beruniy rayonında jıllıq quwatlılıǵı 36 mıń tonna bolǵan sharwa hám balıq azıqlıǵın islep shıǵarıwǵa mólsherlengen zamanagóy Agrokompleks joybarın iske qosıw boyınsha bir qatar wazıypalar belgilep berildi.

S.Xalmuratov – Xalıq deputatları Qaraózek rayonlıq Keńesi deputatı, ÓzMTDP deputatlıq toparı baslıǵı.