Xalq deputatlari Qo‘qon shahar Kengashining 30-sessiyasida shahar IIB boshlig‘ining jamoat tartibini saqlash, xavfsizlikni ta’minlash va huquqbuzarliklar profilaktikasi bo‘yicha 2026-yilning 9 oyi davomida amalga oshirilgan ishlar yuzasidan hisoboti tinglandi.

Ma’lum qilinishicha, ko‘rilgan tezkor-profilaktik choralar natijasida umumiy jinoyatlar soni 1 073 tadan 1 035 taga, oldini olish mumkin bo‘lgan jinoyatlar 538 tadan 371 taga, axborot texnologiyalari yordamida sodir etilgan jinoyatlar esa 71 tadan 70 taga kamaygan. Shu bilan birga, aniqlangan jinoyatlar soni 464 tadan 594 taga oshgani qayd etildi.

Jamoat xavfsizligini mustahkamlash maqsadida shaharning kirish-chiqish joylari, mahallalar va turli obyektlarga davlat raqamlarini aniqlovchi qurilmalar hamda kuzatuv kameralari o‘rnatilib, “Qalqon” dasturiga integratsiya qilindi. Shuningdek, “Xavfsiz bot” va “Stopnarko” kabi loyihalar joriy etilib, yoshlar o‘rtasida jinoyatchilikning oldini olishga qaratilgan “Fidokor yoshlar” patrullik guruhlari va “Qo‘qon tajribasi” dasturi ishlab chiqildi.

️Qo‘riqlash tizimini kuchaytirish doirasida 938 ta xonadon va 78 ta obyekt texnik qo‘riqlovga olindi. Ko‘p qavatli uylar, maktab va maktabgacha ta’lim tashkilotlarida xavfsizlikni oshirish maqsadida favqulodda chaqiruv (SOS) tugmalari o‘rnatildi.

Hisobotda huquqbuzarliklar profilaktikasi natijalari ham ko‘rib chiqildi. Qayd etilishicha, 9 oy davomida profilaktika inspektorlari tomonidan 19 919 ta ma’muriy bayonnoma rasmiylashtirilgan, tazyiq va zo‘ravonlikka uchragan 898 nafar xotin-qizga himoya orderi berilgan. Shuningdek, yo‘l-transport hodisalarining oldini olish va kiberjinoyatchilikka qarshi kurashish masalalariga ham e’tibor qaratildi.

Sessiya yakunida jamoat tartibini saqlash, fuqarolar xavfsizligini ta’minlash, huquqbuzarliklarning barvaqt oldini olish hamda mas’ul idoralar faoliyati samaradorligini oshirish yuzasidan tegishli qaror qabul qilindi.

Xalq deputatlari Qo‘qon shahar Kengashi