Xalıqtıń bántligin támiyinlew, kámbaǵallıqtı qısqartıw, puqaralardıń dáramatların arttırıw hám isbilermenlik jumısın qollap-quwatlaw búgingi kúnniń áhmiyetli wazıypalarınan biri bolıp esaplanadı. Bul baǵdarda xalıqtıń mashqalaların úyreniw, olardıń bántligin támiyinlew hám jańa jumıs orınların jaratıwǵa ayrıqsha itibar qaratılmaqta.

“Moynaq” mákan puqaralar jıyıni “Emlewxana” saylaw okruginde xalıqtıń turmıs dárejesin jaqsılaw, kem támiyinlengen shańaraqlardı qollap-quwatlaw hám puqaralardı dáramatlı miynet penen támiyinlew baǵdarlarında ámelge asırılıp atırǵan jumıslar ayrıqsha áhmiyetke iye bolmaqta.

Bul aymaqta jámi 3 103 xalıq, 536 xojalıq hám 730 shańaraq jasaydı. Xalıqtıń bántligin támiyinlew hám shańaraqlardıń ekonomikalıq imkaniyatların keńeytiw maqsetinde bir qatar ámeliy jumıslar alıp barılmaqta.

Sonıń ishinde, kem támiyinlengen shańaraqlardan 8 puqara jumısqa jaylastırıldı, jáne 7 puqaranıń ózin-ózi bánt etiwi támiyinlendi. Bul bolsa puqaralardıń dáramat dereklerin qáliplestiriw hám shańaraqlardıń abadanlıǵın arttırıwǵa xızmet etpekte.

Sonday-aq, isbilermenlik penen shuǵıllanıwın bildirgen puqaralardı qollap-quwatlaw maqsetinde 38 puqaraǵa jámi 851 million 900 mıń sum muǵdarında kredit qarjıları ajıratıldı. Usı qarjılar esabınan isbilermenlik jumısın jolǵa qoyıw hám keńeytiw arqalı 40 jańa jumıs ornı jaratıldı.

Deputatlıq jumısı sheńberinde xalıqtıń bántligin támiyinlew, isbilermenlik baslamaların qollap-quwatlaw hám kem támiyinlengen shańaraqlardıń turmıs sharayatın jaqsılaw máselelerine ayrıqsha itibar qaratılmaqta.

Kámbaǵallıqtı qısqartıw tek ǵana materiallıq járdem kórsetiw menen sheklenbeydi. Eń áhmiyetlisi, hár bir shańaraqqa dáramat tabıw imkaniyatın jaratıw, puqaralardıń miynet etiw hám isbilermenlik penen shuǵıllanıwǵa bolǵan umtılısların qollap-quwatlawdan ibarat.

Tiykarǵı maqset — xalıqtıń bántligin támiyinlew, shańaraqlardıń dáramatın arttırıw hám puqaralar ushın múnásip turmıs sharayatın jaratıw bolıp esaplanadı.
Xalıq deputatları Moynaq rayonlıq Keńesiniń deputatı
Jamila Dawletova