Xalıq deputatları Taxtakópir rayonlıq Keńesi deputatı Almagúl Pirjanova tárepinen Taxtakópir rayonı Abadanlastırıw basqarmasına deputatlıq soraw jiberildi.
Onda "Ózbekstan" mákan puqaralar jıyını aymaǵındaǵı 11-sanlı mektepten baslap Íqbal hám P.Nurpeysov kóshelerine túngi jaqtılandırıw shıraqların ornatıw máselesi kóterildi.
Usı aymaq turǵınları menen ótkerilgen ushırasıwda bul kóshelerde túngi jaqtılandırıw sistemasınıń joq ekenligi xalıq ushın belgili bir qıyınshılıqlar tuwdırıp atırǵanı atap ótilgen.
Usı múnásibet penen deputat tárepinen juwapker shólkemnen bul máseleni úyrenip shıǵıw, tiyisli ilajlardı kóriw hám belgilengen tártipte rásmiy juwap beriw soraldı.
Deputatlıq jumısınıń tiykarǵı baǵdarlarınan biri - puqaralardıń múrájatların sistemalı sheshiw hám aymaqlardaǵı áhmietli máselelerge ámeliy sheshim tabıwdan ibarat.