Xalq deputatlari Tuproqqal’a tuman Kengashi deputati N. Allaberganova tomonidan “Aholi bandligi to‘g‘risida”gi Qonun ijrosini o‘rganish maqsadida tuman Kambag‘allikni qisqartirish va bandlik bo‘limiga tashrif amalga oshirildi.

Tashrif davomida deputat mazkur bo‘limda fuqarolar bandligini ta’minlash bo‘yicha olib borilayotgan ishlar bilan batafsil tanishdi. Xususan, ishsiz fuqarolarni aniqlash va ro‘yxatga olish jarayonlari, ularni munosib ish o‘rinlariga joylashtirish, kasb-hunarga qayta tayyorlash hamda zamonaviy mehnat bozoriga moslashtirish tizimi o‘rganildi.

Shuningdek, aholini ijtimoiy qo‘llab-quvvatlashga qaratilgan subsidiya ajratish, tadbirkorlik tashabbuslarini qo‘llab-quvvatlash hamda ijtimoiy yordam ko‘rsatish mexanizmlarining amaliyotdagi holati ham ko‘zdan kechirildi.

O‘rganish jarayonida bo‘lim mutaxassislari bilan ochiq va konstruktiv muloqot o‘tkazilib, sohadagi mavjud muammolar, ularning yuzaga kelish sabablari hamda ularni bartaraf etish bo‘yicha taklif va fikrlar atroflicha muhokama qilindi. Mutaxassislar tomonidan amaldagi tizimni yanada takomillashtirish, fuqarolar murojaatlariga tezkor va samarali yechim topish yuzasidan takliflar bildirildi.

Tashrif yakunida aholi bandligini ta’minlash, kambag‘allikni qisqartirish hamda mehnat bozorida samaradorlikni oshirish yo‘nalishidagi ishlarni yanada kuchaytirish, shuningdek, davlat xizmatlari sifatini oshirish muhim ustuvor vazifa sifatida qayd etildi.