Mahalliy Kengashlar o‘rtasida o‘zaro tajriba almashish amaliyoti yo‘lga qo‘yilmoqda

 🇺🇿 O‘zbekiston Respublikasi Oliy Majlisi Senati Kengashining 2026-yil 15-yanvardagi “O‘zbekiston Respublikasi Oliy Majlisi Senatining 2026-yil birinchi yarim yilligiga mo‘ljallangan ish rejasi ijrosi to‘g‘risida”gi KQ-291–V-sonli qaroriga muvofiq, hududiy Kengashlar faoliyatini yanada takomillashtirish, ilg‘or tajribalarni ommalashtirish hamda o‘zaro hamkorlikni kuchaytirish masalalariga alohida e’tibor qaratilmoqda.

 💼 Mazkur qarorning 3-ilovasi 21-bandida Qoraqalpog‘iston Respublikasi Jo‘qorg‘i Kengesi, xalq deputatlari viloyatlar, Toshkent shahar, shuningdek tuman (shahar) Kengashlari o‘rtasida o‘zaro tajriba almashishni tizimli yo‘lga qo‘yish belgilangan. Jumladan, hududlararo tajriba almashish reja-grafigini ishlab chiqish, namunali sessiyalar, doimiy komissiya yig‘ilishlari hamda siyosiy partiya guruhlari majlislarini yuqori saviyada tashkil etish, shuningdek tuman va shaharlar kesimida ham bunday amaliyotni keng joriy etish vazifalari ko‘rsatib o‘tilgan.

 📆 Ushbu vazifalar ijrosini ta’minlash maqsadida, xalq deputatlari Toshkent shahar Kengashi raisi tomonidan 2026-yil 26-fevral kuni tuman Kengashlari o‘rtasida o‘zaro tajriba almashish amaliyoti rejasi tasdiqlandi. Rejaga asosan, 2026-yil 4-martdan 22-aprelga qadar hududiy Kengashlar kotibiyatlarining ijobiy tajribalari va amaliy faoliyati bilan yaqindan tanishish ishlari olib borilmoqda.

 🔼 Shu doirada bugun xalq deputatlari Shayxontohur tumani Kengashi kotibiyati mudiri Nematilla Karimov hamda kotibiyat bosh mutaxassisi Muhlisa Yo‘ldoshxo‘jayeva Uchtepa tumani Kengashiga tashrif buyurdi. Tashrifdan asosiy maqsad — Senat qarorida belgilangan vazifalar ijrosini ta’minlash, o‘zaro tajriba almashish hamda Uchtepa tumani Kengashi faoliyati bilan yaqindan tanishishdan iborat bo‘ldi.

 📁 Tashrif davomida mehmonlar tomonidan Uchtepa tumani Kengashining ish yuritish tizimi, deputatlik faoliyati, shuningdek doimiy komissiyalar faoliyati o‘rganildi. Xususan, namunali tarzda tashkil etilgan Mahalliy byudjet, tadbirkorlikni rivojlantirish va iqtisodiy islohotlarni amalga oshirish masalalari bo‘yicha doimiy komissiya yig‘ilishi jarayoni bilan tanishildi. Unda navbatdagi sessiya kun tartibiga kiritilishi rejalashtirilgan masalalarning doimiy komissiya tomonidan qanday tarkibda, tartibda va qaysi mezonlar asosida ko‘rib chiqilishi amaliy jihatdan ko‘rsatib berildi.

 ↗️ Mazkur tajriba almashish jarayoni hududlar o‘rtasida samarali hamkorlikni yo‘lga qo‘yish, ilg‘or boshqaruv usullarini ommalashtirish hamda mahalliy Kengashlar faoliyati samaradorligini oshirishda muhim ahamiyat kasb etmoqda.

 📊 Yakuniy xulosalarga ko‘ra, bunday o‘zaro tashriflar va amaliy o‘rganishlar mahalliy Kengashlar faoliyatini yangi bosqichga olib chiqish, qarorlar ijrosini ta’minlashda tizimli yondashuvni kuchaytirish hamda deputatlik nazoratini yanada mustahkamlashga xizmat qilishi ta’kidlandi.