Qoziguzar mahallasida Izza arig‘i holati va hududni obodonlashtirish masalalari o‘rganildi

🗂 O‘zbekiston Respublikasi Vazirlar Mahkamasining 2013-yil 8-noyabrdagi 304-son "Respublika shaharlarida va tuman markazlarida kommunal drenaj tizimi ishlarini yaxshilashga doir qo‘shimcha chora-tadbirlar to‘g‘risida"gi qarori ijrosi yuzasidan xalq deputatlari Uchtepa tumani Kengashiga O‘zLiDePdan saylangan "15-Izza" saylov okrugi deputati Akbar Narziyev tomonidan Qoziguzar mahallasida navbatdagi o‘rganish ishlari amalga oshirildi.

💼 Mazkur o‘rganishda xalq deputatlari Uchtepa tumani Kengash kotibiyati mudiri Anvar Usmanov, kotibiyat bosh mutaxassisi Umidbek Abilov hamda mahalla raisi Muxtabar Xasanova ishtirok etdi.

🕯 O‘rganish davomida Qoziguzar MFY hududidan oqib o‘tuvchi Izza arig‘i, xususan 3-tor Qoziguzar ko‘chasi hududidagi holat joyiga chiqib ko‘zdan kechirildi. Aniqlanishicha, drenaj tizimi xodimlari tomonidan ariqni muntazam tozalash ishlari olib borilayotgan bo‘lsa-da, ayrim fuqarolarning atrof-muhitga mas’uliyatsiz munosabati oqibatida ariq turli maishiy chiqindilar bilan ifloslangan. Shuningdek, fuqarolar tomonidan mazkur ariqning qirg‘oqlarini zamonaviy talablar asosida betonlashtirish, hududda bolalar maydonchasi hamda mahalla aholisi uchun dam olish maskanini barpo etish takliflari bildirildi.

📝 O‘rganish yakunlari bo‘yicha fuqarolar tomonidan bildirilgan takliflarni amaliy hal etish maqsadida ariqni betonlashtirish hamda bolalar maydonchasini barpo etish masalalari yuzasidan Uchtepa tumani hokimining qurilish, to‘siqsiz muhit yaratish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha o‘rinbosari – tuman Obodonlashtirish boshqarmasi boshlig‘i Nurali Ismatov nomiga deputatlik so‘rovi kiritilishi belgilandi.