Xalıq deputatları Bozataw rayonlıq Keńesi 9-sanlı “Dawıt kól” saylaw okruginen (ÓzLiDeP) saylanǵan deputat G.Bekbosınova, 8-sanlı “Erkindarya” saylaw okruginen (ÓzLiDeP) saylanǵan deputat J.Jumanazarov hám Keńes sekretariatınıń bas qánigesi K.Aitmuratovlar birgelikte “Aqeden” awılında boldı.
Deputatlar dáslep “Aqeden” awılındaǵı puqaralar menen ushırasıw ótkerip, olardıń turmıs jaǵdayı, kúndelikli mashqalaları hám sociallıq awqalı menen jaqınnan tanıstı. Ushırasıw dawamında awıl xalqı tárepinen ishimlik suw támiynatı, ishki kóshelerdi abadanlastırıw, elektr energiyası menen úzliksiz támiynatı hám basqa da máseleler boyınsha pikir-úsınıslar bildirildi.
Bunnan soń deputatlar Qalimbetov Ómirbaydıń shańaraǵında bolıp, onıń xojalıq egin menen shuǵıllanıw hám shańaraq dáramatın arttırıw baǵdarında ámelge asırıp atırǵan jumısları menen tanıstı. Shańaraqta zamanagóy ıssıxana shólkemlestirilip, onda qıyar, pomidor hám basqa da palız ónimleri jetistirilip atırǵanı kórildi. Sonıń menen birge, jerden nátiyjeli paydalanıw ushın kishi awıl xojalıǵı texnikaları hám organikalıq tóginler tayarlanǵanı úyrenildi.
Deputatlar shańaraqtaǵı isbilermenlik hám miynet arqalı qosımsha dáramat tabıw tájiriybesin joqarı bahalap, bunday úlgili shańaraqlardı kóbeytiw, xalıqtıń bántligin támiyinlew hám onıń dáramat dárejesin arttırıwda áhmiyetli ekenligin atap ótti.
Kóterilgen máselelerdi izbe-iz úyreniw hám olardıń durıs sheshimin tabıw boyınsha tiyisli mákemeler menen birgelikte ámeliy ilajlar belgilep alındı.