Fikrimcha, O‘zbekiston Respublikasi Prezidenti Shavkat Mirziyoyev hamda Slovakiya Respubikasi Bosh vaziri Robert Fitso o‘rtasida shu yilning 9 may kuni Ko‘ksaroy qarorgohida bo‘lib o‘tgan uchrashuvni nafaqat ikki davlat o‘rtasidagi aloqalarning yangi pog‘onasi, balki zamonaviy xalqaro munosabatlar modelining yorqin namunasi sifatida baholasak to‘g‘riroq bo‘ladi. Chunki, bugun O‘zbekiston butun jahon bilan ochiq muloqot, o‘zaro hamkorlik va manfaatli aloqalarni rivojlantirib bormoqda. Slovakiya bilan olib borilayotgan muzokaralarni ham shubhasiz ana shunday yondashuvlar sirasiga kiritish mumkin. Uchrashuv chog‘ida qator yo‘nalishlarda, jumladan, sanoat, agrosanoat, “yashil” energetika, taʼlim, madaniyat va raqamli texnologiyalar sohasida aniq va maqsadli kelishuvlarga erishilgani alohida ahamiyatga ega.

Bu hamkorlikda eʼtiborimizni tortadigan asosiy muhim jihat shundaki, u ikki tomon uchun ham amaliy samara berishga qaratilgan. Slovakiyaning ilg‘or texnologiya va ishlab chiqarish salohiyati O‘zbekistondagi investitsiya muhiti bilan birlashar ekan, har ikki mamlakat iqtisodiyoti uchun yangi imkoniyat eshiklari ochilishi shubhasiz.

Ayniqsa, taʼlim va startap sohalaridagi kelishuvlar yoshlar uchun yangi istiqbollarni ochib berishi bilan g‘oyat ahamiyatli. Komenskiy universiteti bilan qo‘shma dasturlar, IT venchur fondining tashkil etilishi - bu yerda nafaqat iqtisod, balki, bilim va innovatsiyani uyg‘unlikda rivojlanishiga hissa qo‘shadi, desak adashmagan bo‘lamiz. Muzokaralar yakunida o‘zaro hamkorlik bo‘yicha “yo‘l xaritasi”ning qabul qilinishi esa bu kelishuvlarni qog‘ozda emas, amalda bajarish qatʼiyati borligidan dalolat beradi.

Bunday muloqotlar natijasida yurtimiz jahon bilan nafaqat iqtisodiy, balki maʼnaviy va ilmiy aloqalarni ham mustahkamlashga erishmoqda. Demak, Slovakiya bilan boshlangan yangi aloqalar bosqichi tashqi siyosatdan tashqari, mamlakatimizning ichki taraqqiyoti uchun ham xizmat qiladi.

Said Donishev, Xalq deputatlari Jizzax shahar Kengashi deputati