Mazkur klinika — yurtimizdagi eng yirik davolash muassasalaridan biri bo‘lib, 1200 dan ziyod o‘rin va kuniga 850 qatnovga mo‘ljallangan maslahat-diagnostika poliklinikasiga ega. Har yili bu yerda 250 mingdan ortiq bemorlarga terapevtik, jarrohlik, akusher-ginekologiya va pediatriya yo‘nalishlarida tibbiy xizmatlar ko‘rsatiladi.

Tadbirda Sog‘liqni saqlash vazirligi, huquq-tartibot idoralari vakillari va klinika xodimlari ishtirok etib, tibbiyot tizimini korrupsiyadan xoli sohaga aylantirish borasidagi muhim vazifalar muhokama qilindi.

Ta’kidlanganidek, ushbu klinika nafaqat davolash muassasasi, balki zamonaviy tibbiy ta’lim klasteri sifatida ham faoliyat yuritmoqda. Operatsiya, diagnostika va muolajalar jarayonida talabalar bevosita ishtirok etib, bilimlarini amaliyotda mustahkamlashmoqda. Shu bois korrupsiyaga qarshi kurashish mavzusining aynan shu maskanda ko‘tarilgani bejiz emas: kelajakdagi shifokorlar nafaqat bilim va ko‘nikmalar, balki kasbga sodiqlik va halollik qadriyatlarini ham egallab borishlari muhim.

Tadbir yakunida deputat Turdiqul Bobomuratov hamda ishtirokchilar tizimda shaffoflikni kuchaytirish, halollik tamoyillarini keng targ‘ib qilish va korrupsiyaga qarshi kurashish bo‘yicha aniq taklif va tavsiyalarni ilgari surdilar.