Bugungi kunda ekologik muammolar, xususan, qurilish chiqindilarining noto‘g‘ri tashlab ketilishi aholining salomatligi va atrof-muhitga salbiy ta’sir ko‘rsatmoqda. Shu sababli bu boradagi muammolarga befarq bo‘lmaslik har bir fuqaroning, ayniqsa, xalq vakillarining zimmasiga mas’uliyat yuklaydi. Ana shunday ijtimoiy mas’uliyatni chuqur anglagan xalq vakillaridan biri — 23-"Zarqaynar" okrugi deputati Ismoil Sagdullayev tomonidan yuzaga kelgan muammo bartaraf etildi.

Mazkur holat tumanning "Shon-Shuxrat" mahallasida ro‘y berdi. Mahalla hududidagi qurilishidan so‘ng hosil bo‘lgan qurilish chiqindilari uzoq vaqt davomida tegishli tartibda olib chiqilmay, mahalla ko‘chalarining bir qismida to‘planib qolgandi. Bu holat nafaqat ko‘zni xiralashtirar, balki piyodalar va haydovchilar uchun ham xavf tug‘dirardi. Aholi bu masala bo‘yicha bir necha bor mahalla faollariga va tegishli tashkilotlarga murojaat qilgan bo‘lsa-da, muammo o‘z vaqtida hal etilmadi.

Holatga befarq bo‘lmagan deputat I.Sagdullayev joyiga chiqib, aholi bilan uchrashdi, muammoning sabablari va oqibatlarini o‘rgandi. Aholi vakillarining fikrlarini inobatga olgan holda, u ushbu chiqindilarni qisqa muddat ichida olib chiqilishi bo‘yicha mutasaddi tashkilotlar bilan aloqaga chiqdi. Uning tashabbusi bilan maxsus texnika jalb etilib, bir necha kun davomida qurilish chiqindilari to‘liq yig‘ishtirilib, chiqindixonaga olib chiqildi.

 Shu bilan birga, deputat kelgusida bunday holatlarning oldini olish maqsadida mahalla faollari, quruvchilar va aholi o‘rtasida tushuntirish ishlarini olib bordi. Unda har bir fuqaroning ekologik madaniyati, obodonchilik ishlaridagi ishtiroki, qurilishdan keyingi tozalikka bo‘lgan munosabati muhimligi ta’kidlandi.