Nurobod tumani “Sarikul” mahalla fuqarolar yig‘inida ekologik barqarorlikni ta’minlash va hududni yanada obodonlashtirishga qaratilgan muhim tashabbuslar amalga oshirildi. Xalq deputatlari Nurobod tumani Kengashi deputati Sobirxon Samatov tashabbusi bilan tashkil etilgan ushbu tadbir “Yashil makon” umummilliy dasturi hamda “Obod yurt mahalladan boshlanadi” shiori ostida o‘tkazildi.

Mazkur umumxalq xayriya hashari doirasida mahalla aholisi, yoshlar va faollar bir yoqadan bosh chiqarib, hududni ko‘kalamzorlashtirish ishlarida faol ishtirok etdilar. 

Tadbir davomida nafaqat daraxt ekish, balki hududni tozalash, obodonlashtirish va aholi o‘rtasida ekologik madaniyatni yuksaltirishga alohida e’tibor qaratildi. Bu kabi tashabbuslar fuqarolarda ona tabiatga mehr va mas’uliyat hissini oshirish bilan birga, kelajak avlod uchun sog‘lom va yashil muhit yaratishga xizmat qilmoqda.