Mamlakatimizda ta’lim sifatini oshirish, o‘quvchi-yoshlar uchun zamonaviy shart-sharoitlar yaratish davlat siyosatining ustuvor yo‘nalishlaridan biri hisoblanadi. Bu borada O‘zbekiston Respublikasi Prezidentining 2024-yil 24-dekabrdagi PQ-454-sonli “2025-2027-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi qarori muhim dasturilamal bo‘lib xizmat qilmoqda.

  Ushbu qaror doirasida Sho‘rchi tumanida ham ijtimoiy soha ob’ektlarini tubdan yangilash bo‘yicha aniq manzilli chora-tadbirlar izchil amalga oshirilmoqda.

  Kuni kecha xalq deputatlari Sho‘rchi tumani Kengashi deputati Almardon Mamashukurov hamda tuman Kengashi kotibiyati bosh mutaxassisi Botir Rajabovlar tomonidan mazkur qarorning tumandagi ijro holati jamoatchilik nazorati tartibida o‘rganildi.

  O‘rganish ob’ekti sifatida tumanning “Oqqo‘rg‘on” mahallasi hududida joylashgan 8-umumiy o‘rta ta’lim maktabi tanlandi. Ta’kidlash joizki, ushbu maktabda PQ-454-sonli qarorga asosan 480 o‘rinli yangi zamonaviy o‘quv binosini qurish ishlari belgilangan edi.

  O‘rganishlar natijasida binoning qurilish-montaj ishlari to‘liq yakunlangani, hozirda so‘nggi pardozlash va jihozlash jarayonlari ketayotgani ma’lum bo‘ldi. Ishchi guruh tomonidan bino xonalarining loyiha muvofiqligi, sifat darajasi hamda zamonaviy inventarlar bilan ta’minlanish holati atroflicha ko‘zdan kechirildi.

  Monitoring davomida jihozlash ishlarini sifatli yakunlash va ochilish marosimiga tayyorgarlik ko‘rish yuzasidan tegishli mas’ullarga tavsiyalar berildi.

  “Prezidentimiz tomonidan imzolangan ushbu qaror hududlardagi uzoq yillik infratuzilma muammolarini hal etishga qaratilgan. Biz deputat sifatida har bir sarflanayotgan mablag‘ va sifat ko‘rsatkichlari uchun mas’ulmiz. Maqsadimiz — tez kunda Oqqo‘rg‘on yoshlarining barcha qulayliklarga ega zamonaviy va shinam maktabda ta’lim olishlarini ta’minlashdir”, — deydi deputat A.Mamashukurov.

  Bu kabi o‘rganishlar tuman Kengashi tomonidan doimiy nazoratga olingan bo‘lib, PQ-454-sonli qaror doirasidagi har bir ob’ektning foydalanishga topshirilishi qat’iy tahlil qilib boriladi.