Xalq vakillari bo‘lgan deputatlar joylarda saylovchilar bilan muntazam muloqot olib borib, aholini qiynayotgan masalalarga amaliy yechim topishda faol ishtirok etmoqda.Jumladan, Xalq deputatlari Parkent tumani Kengashiga 15-“Beshkappa” saylov okrugidan saylangan deputat, tuman Kengashi kotibiyati mudiri Berdiqulova Mavluda Tojiddinovnaga o‘zi saylangan okrugdagi “Oybek” va “Beshkappa” MFY fuqarolari tomonidan tomorqa yerlarini sug‘orish uchun suv ta’minoti bilan bog‘liq masala yuzasidan murojaat bildirildi.Deputat tomonidan holat joyiga chiqib o‘rganilib, masalani tezkor hal etish maqsadida Parkent tuman suv yetkazib berish xizmati davlat muassasasi direktori T. Salimov tuman Kengashiga taklif etildi. Uchrashuv davomida aholi vakillari ishtirokida muammo atroflicha muhokama qilindi.Mas’ul rahbar tomonidan tomorqa uchun suv yetkazib beriladigan tarmoqning boshlanish joyiga yangi quvur o‘rnatish ishlari olib borilayotgani, ikki kun ichida suv ta’minoti tiklanishi ma’lum qilindi.Natijada aholi uchun noqulaylik tug‘dirayotgan masala deputat tashabbusi va mutasaddi tashkilotlar hamkorligida ijobiy hal etildi. Bu esa xalq vakillarining hududdagi muammolarni bartaraf etishdagi amaliy faoliyatidan yana bir namunadir.