Ko‘chama-ko‘cha yurib muammolar o‘rganildi

Xalq deputatlari Qo‘shko‘pir tumani Kengashi deputati Hajiboy Davletovich Ibragimov Chamanzor mahallasi "Yettilik" jamoasi bilan hamkorlikda mahallada ko‘chama-ko‘cha yurib, fuqarolarni qiynayotgan dolzarb muammolarni o‘rgandi.
Ochiq muloqotlar davomida aholi murojaatlari tinglanib, mavjud muammolarni tizimli hal etish, hudud infratuzilmasini yanada yaxshilash hamda fuqarolarning hayot sifatini oshirishga qaratilgan ustuvor vazifalar belgilab olindi.
Deputat ta’kidlaganidek, xalq bilan bevosita muloqot qilish, har bir ko‘cha va xonadondagi muammolarni joyiga chiqib o‘rganish hamda ularning yechimi yuzasidan amaliy choralarni belgilash deputatlik faoliyatining ustuvor yo‘nalishlaridan biridir.
Bu kabi uchrashuvlar fuqarolarning ishonchini mustahkamlash, deputatlik nazoratini kuchaytirish va hududlarni kompleks rivojlantirishga xizmat qiladi.