Xalq deputatlari Paxtakor tumani Kengashining 13-Bo‘z saylov okrugi deputati D. Ergasheva o‘z saylov okrugi hududidagi Mingchinor mahallasi U.Nosir ko‘chasida mahalla faollari bilan birgalikda fuqarolar xonadonlariga tashrif buyurdi.

Muloqotlar davomida xonadonlar atrofi, ko‘cha bo‘ylari va umumiy foydalanish hududlarini ozoda saqlash, obodonlashtirish ishlarini yanada jadallashtirish, begona o‘t-o‘lanlarni o‘z vaqtida tozalash hamda yashil hududlarni asrab-avaylash yuzasidan tushuntirish ishlari olib borildi.

Shuningdek, fuqarolar obodonlashtirish tadbirlarida faol ishtirok etishga, o‘z yashash hududiga mas'uliyat bilan yondashishga va mahallaning yanada obod hamda fayzli bo‘lishiga hissa qo‘shishga chorlandi.

Hamjihatlikda amalga oshirilayotgan bunday sa'y-harakatlar mahallalarda ozoda va qulay yashash muhitini yaratishga xizmat qilmoqda.