#sessiya_30


Xalq deputatlari Kogon shahar Kengashining o‘ttizinchi sessiyasi bo‘lib o‘tdi

Bugun, 2026-yil 21-iyul kuni Xalq deputatlari Kogon shahar Kengashining o‘ttizinchi sessiyasi bo‘lib o‘tdi.

Sessiyada Kengash deputatlari, shahar hokimligi mutasaddilari, davlat organlari va tashkilotlar rahbarlari hamda tegishli soha vakillari ishtirok etdi.

Sessiya kun tartibidan o‘rin olgan masalalar yuzasidan shahar hokimi Mirshakar Muzaffarovich To‘raboyevning “2026-yil — Mahallani rivojlantirish va jamiyatni yuksaltirish yili” Davlat dasturi doirasida shaharda amalga oshirilgan ishlar to‘g‘risidagi hisoboti tinglandi.

Shuningdek, O‘zbekiston Respublikasi Prezidentining Kogon shahridagi Xalq qabulxonasi bilan hamkorlikda murojaatlar bilan ishlash holati, shaharda qonuniylikni mustahkamlash, fuqarolarning huquq va erkinliklarini ta’minlash, jinoyatchilik va huquqbuzarliklarning oldini olish borasida amalga oshirilayotgan ishlar muhokama qilindi.

Sessiyada Kogon shahar prokurori Shohijaxon Ergashev tomonidan kriminogen vaziyatni yaxshilash, jinoyatlarning barvaqt oldini olish va huquqbuzarliklarning profilaktikasi bo‘yicha ko‘rilayotgan choralar yuzasidan axborot berildi.

Bundan tashqari, shahar IIB boshlig‘i Niyoziy Boltayev tomonidan jamoat xavfsizligi va huquqbuzarliklarning oldini olish holati, Adliya bo‘limi tomonidan esa norma ijodkorligi va huquqni qo‘llash amaliyoti yuzasidan ma’lumotlar taqdim etildi.

Sessiya davomida ekologik madaniyatni oshirish, ko‘p kvartirali uy-joylarni ta’mirlash dasturlariga o‘zgartirish kiritish, mahalliy budjetning qo‘shimcha manbalaridan samarali foydalanish, aholiga qulay shart-sharoitlar yaratish masalalari ham ko‘rib chiqildi.

Sog‘liqni saqlash, bolalar saratoniga qarshi kurashish bo‘yicha milliy strategiya ijrosi, yoshlar siyosati, yoshlarning intellektual salohiyatini oshirish va bo‘sh vaqtini mazmunli tashkil etish borasidagi amalga oshirilgan ishlar yuzasidan tegishli rahbarlarning hisobotlari tinglandi.

Sessiyada deputatlarning saylovchilar oldida axborot berishi, deputatlik odobi qoidalariga rioya etilishi hamda murojaatlar bilan ishlash samaradorligini oshirishga qaratilgan masalalar yuzasidan tegishli qarorlar qabul qilindi.

Sessiya yakunida kun tartibidagi masalalar bo‘yicha mas’ullarga tegishli vazifalar belgilandi.

Xalq deputatlari
Kogon shahar Kengashi
axborot xizmati

Telegram . Instagram . Facebook . Youtube . E-kengash