️Al-Xorazmiy mahallasida joylashgan 11 qavatli ko‘p xonadonli uyda istiqomat qiluvchi fuqarolar uchun so‘nggi sakkiz oy davomida eng dolzarb va og‘riqli masalalardan biri — lift nosozligi bo‘lib kelayotgan edi. Mazkur liftning uzoq vaqt davomida ishlamasligi ayniqsa keksalar, nogironligi bo‘lgan shaxslar hamda kichik yoshdagi bolali oilalar uchun jiddiy noqulayliklar tug‘dirib, kundalik hayot tarziga salbiy ta’sir ko‘rsatib kelgan.

️Muammoni bartaraf etish maqsadida uy aholisining tashabbuskor vakillari tomonidan sakkiz oy mobaynida turli mas’ul tashkilot va idoralarga bir necha bor yozma va og‘zaki murojaatlar yo‘llangan bo‘lsa-da, afsuski, ushbu murojaatlar kutilgan natijani bermagan. Natijada, fuqarolar muammosi uzoq vaqt davomida ochiq qolib kelgan.

️Chilonzor tumani Bek To‘pi okrugi bo‘yicha xalq deputati Xusainov A.A ishtirokida o‘tkazilgan mahalla yig‘ilishida uy aholisi o‘z muammolarini bevosita deputat e’tiboriga havola qildi. Yig‘ilish davomida lift masalasi ko‘p qavatli uylarda yashovchi aholi, ayniqsa keksalar uchun naqadar muhim ekanligi atroflicha bayon etilib, mazkur muammoni ijobiy hal etishda amaliy yordam ko‘rsatish so‘raldi.

️Deputat mazkur masalaga befarq bo‘lmay, uni qisqa vaqt oralig‘ida hal etishini ma’lum qildi. Mazkur masalani hal etish jarayonida deputat hamda Al-Xorazmiy mahalla fuqarolar yig‘ini sektor rahbari — Azlyarov A.A tomonidan mas’ul tashkilotlar bilan samarali hamkorlik yo‘lga qo‘yilib, murojaatlarning ijrosi tizimli ravishda muvofiqlashtirildi va qat’iy nazoratga olindi.

Natijada, sakkiz oy davomida ishlamay turgan lift to‘liq ta’mirlanib, qayta ishga tushirildi.