ТАЪЛИМ ВА ХАВФСИЗЛИК МАСАЛАЛАРИ ЎРГАНИЛДИ
Туман ҳокими, Халқ депутатлари Янгиқўрғон тумани Кенгаши депутати Нажмиддинов Асадулла Икромович томонидан 31-умумтаълим мактабида ўрганиш ишлари олиб борилди.
Ўрганиш давомида мактабда ёзги таътил кунларида ўқувчи-ёшларнинг бўш вақтини мазмунли ташкил этиш, уларни спорт, маданий ва маънавий-маърифий тадбирларга кенг жалб этиш масалалари муҳокама қилинди. Хусусан, “Долзарб 90 кун” миллий лойиҳаси доирасида амалга оширилиши режалаштирилган спорт мусобақалари, турли тўгараклар, учрашув ва тарғибот тадбирлари юзасидан масъуллар билан фикр алмашилди.
Шунингдек, таълим муассасасида имконияти чекланган фуқаролар учун яратилган шарт-шароитлар ҳам ўрганилди. Мактаб ҳудудидаги пандуслар, кириш-чиқиш йўлаклари, санитария хоналари ҳамда “Тўсиқсиз муҳит” талабларига мувофиқ яратилган инфратузилманинг ҳолати кўздан кечирилди.
Ўрганиш жараёнида мактаб битирувчилари учун ўтказилаётган якуний давлат аттестацияси имтиҳонлари ҳам кузатилди. Имтиҳонларнинг амалдаги тартиблар асосида, очиқлик, шаффофлик ва адолат тамойилларига мувофиқ ташкил этилганлигига алоҳида эътибор қаратилди.
Ўрганиш якунида таълим муассасасида мавжуд айрим камчиликларни бартараф этиш, ёшларнинг бўш вақтини самарали ташкил этиш ҳамда барча учун хавфсиз ва қулай таълим муҳитини яратиш бўйича масъулларга тегишли топшириқлар берилди.