Yig‘ilishda doimiy komissiya a’zolari, ekspert guruhi hamda yoshlar maslahat guruhi a’zolari ishtirok etdi.

Yig‘ilish kun tartibida davlat organlari va tashkilotlarida norma ijodkorligi, huquqni qo‘llash amaliyoti va huquqiy targ‘ibot ahvoli to‘g‘risida tuman Adliya bo‘limi boshlig‘i N.Ismoilovning axboroti eshitilib, muhokama qilindi.

Adliya bo‘limi boshlig‘i o‘z axborotida 2026-yilning 6 oyi davomida amalga oshirilgan ishlar haqida ma’lumot berdi. Jumladan, davlat organlari va tashkilotlarida 3 ta o‘rganish va 8 ta monitoring o‘tkazilgani, aniqlangan qonunbuzilish holatlarini bartaraf etish yuzasidan 2 ta taqdimnoma va 56 ta ogohnoma kiritilgani, natijada 1 nafar shaxs intizomiy javobgarlikka hamda 4 nafar shaxs ma’muriy javobgarlikka tortilgani ma’lum qilindi.

O‘rganishlar davomida tuman Yo‘llardan foydalanish tashkilotida xodimlarning mehnat huquqlari buzilganligi, Kadastr va Suv oqava tashkilotlarida davlat xizmatlari ko‘rsatish sohasida qonunbuzilish holatlari aniqlangan. Mazkur holatlar yuzasidan tegishli choralar ko‘rilib, aniqlangan kamchiliklar bartaraf etilgan.

Bundan tashqari, fuqarolar va yuridik shaxslarning manfaatlarini ko‘zlab fuqarolik ishlari bo‘yicha sudlarga 54 ta da’vo va ariza kiritilgani hamda ularning barchasi qanoatlantirilgani ta’kidlandi.

Yig‘ilishda huquqiy targ‘ibot ishlarini kuchaytirish, yangi qabul qilinayotgan normativ-huquqiy hujjatlarning mazmun-mohiyatini aholiga va mas’ullarga yetkazish, huquqni qo‘llash amaliyotida qonuniylikni ta’minlash masalalariga alohida e’tibor qaratildi.

Yig‘ilish yakunida axborot yuzasidan tegishli taklif va tavsiyalar bildirilib, mazkur masala navbatdagi sessiya kun tartibiga kiritish yuzasidan doimiy komissiya qarori qabul qilindi.