Bandixon mahallasida obodonlashtirish va bunyodkorlik ishlari o‘rganildi

Xalq deputatlari Surxondaryo viloyati Kengashi kotibiyati mudiri Sherpo‘lat Boyqulov, Xalq deputatlari Bandixon tumani Kengashi raisi Erkinjon Jo‘rayev hamda tuman Kengashi kotibiyati mudiri Azamat Pardayev Bandixon tumanidagi Bandixon mahallasida bo‘lib, Prezidentimiz tomonidan belgilangan ustuvor vazifalar ijrosi hamda "Mahallada obodlik va mehr-saxovat oyligi" doirasida amalga oshirilayotgan bunyodkorlik va obodonlashtirish ishlari bilan yaqindan tanishdi.

Tashrif davomida mahallada amalga oshirilayotgan keng ko‘lamli obodonlashtirish ishlari atroflicha o‘rganildi. Xususan, ko‘chalar va ichki yo‘llarni tartibga keltirish, ariq-zovurlarni tozalash va soz holatga keltirish, hududlarni obodonlashtirish, yashil maydonlarni kengaytirish, daraxt hamda gul ko‘chatlarini parvarishlash, aholi yashash manzillarining sanitariya holatini yaxshilash borasida olib borilayotgan ishlar ko‘zdan kechirildi.

Shuningdek, hududdagi bunyodkorlik ishlari sifati, ularning belgilangan muddatlarda amalga oshirilishi hamda obodonlashtirish tadbirlarida fuqarolarning faolligi alohida e’tibor markazida bo‘ldi. Amalga oshirilayotgan ishlarning samaradorligini yanada oshirish, mavjud imkoniyatlardan oqilona foydalanish va mahalla hududining ozodaligini doimiy ta’minlash yuzasidan tegishli tavsiya va ko‘rsatmalar berildi.

Mahalla faollari, nuroniylar hamda mas’ullar bilan o‘tkazilgan muloqot chog‘ida hududni yanada obod va fayzli maskanga aylantirish, aholi uchun qulay yashash sharoitlarini yaratish, infratuzilmani bosqichma-bosqich rivojlantirish, aniqlangan muammolarni o‘z vaqtida bartaraf etish hamda obodonlashtirish ishlarini izchil davom ettirish masalalari muhokama qilindi.

Ta’kidlanganidek, mahallalarda obodlik muhitini mustahkamlash, ekologik madaniyatni yuksaltirish, aholi turmush farovonligini oshirish va fuqarolarning ijtimoiy faolligini kuchaytirish davlat siyosatining muhim yo‘nalishlaridan biri hisoblanadi.

Shu bois, "Mahallada obodlik va mehr-saxovat oyligi" doirasida boshlangan bunyodkorlik va obodonlashtirish ishlari kelgusida ham tizimli ravishda davom ettirilib, har bir mahallaning yanada ko‘rkam, ozoda va yashash uchun qulay maskanga aylanishi yo‘lida zarur choralar izchil amalga oshiriladi.

Obod mahalla – farovon hayot, yuksak kayfiyat va taraqqiyot poydevoridir.