Xalq deputatlari Qo‘qon shahar Kengashi raisi O‘.Tojiyeva tomonidan “Chodaklik” mahalla fuqarolar yig‘inida ijtimoiy xodimi F.Nusratovaning O‘zbekiston Respublikasining 2020-yil 10-oktyabrdagi O‘RQ-641-sonli “Nogironligi bo‘lgan shaxslarning huquqlari to‘g‘risida”gi Qonuni ijrosi yuzasidan olib borayotgan ishlari o‘rganildi.

O‘rganish davomida ijtimoiy xodim tomonidan mahallada ijtimoiy himoyaga muhtoj fuqarolarni qo‘llab-quvvatlash, ularning turmush sharoitini yaxshilash hamda manzilli ijtimoiy xizmatlarni tashkil etish bo‘yicha amalga oshirilayotgan ishlar yuzasidan batafsil ma’lumot berildi.

Xususan, joriy yilning o‘tgan davri mobaynida 47 ta oilaga oziq-ovqat mahsulotlari va kiyim-kechaklar yetkazib berilgani, 80 yoshdan oshgan 3 nafar keksaga qarovchilar biriktirilib, ularga muntazam ijtimoiy xizmat ko‘rsatish yo‘lga qo‘yilgani qayd etildi. Shuningdek, 3 nafar tazyiq va zo‘ravonlikdan jabrlangan ayolga himoya orderi rasmiylashtirilgani, 1 nafar yolg‘iz yashovchi fuqaro yakka yolg‘iz yashovchilar reyestriga kiritilib, unga ijtimoiy assistent biriktirilgani ma’lum qilindi.

O‘rganish jarayonida nogironligi bo‘lgan shaxslarning huquqlarini ta’minlash, ularni ijtimoiy qo‘llab-quvvatlash, tibbiy-ijtimoiy reabilitatsiya xizmatlarini kengaytirish, texnik reabilitatsiya vositalari bilan ta’minlash hamda sog‘lomlashtirish maqsadida sanatoriy va sihatgohlarga bepul yo‘llanmalar ajratish tartibi yuzasidan amalga oshirilayotgan ishlar muhokama qilindi.

Shuningdek, fuqarolarning qonunchilikda belgilangan imtiyozlardan foydalanish imkoniyatlari, ijtimoiy xizmatlardan foydalanish tartibi, murojaatlarni ko‘rib chiqish mexanizmlari hamda ehtiyojmand fuqarolarga ko‘rsatilayotgan xizmatlar sifatini yanada oshirish masalalari yuzasidan atroflicha fikr almashildi.

Xalq deputatlari Qo‘qon shahar Kengashi