#deputatlar_nazorati #poytaxtdeputatlari #deputatlik_faoliyati

🏫 Davlat maktabgacha ta’lim tashkilotlarida bolalar xavfsizligi va sanitariya holati deputatlar nazoratida

🏛 “Davlat maktabgacha ta’lim tashkilotlarida bolalar hayoti va sog‘lig‘ini muhofaza qilish maqsadida yong‘in, elektr, sanitariya va umumiy xavfsizlik talablariga rioya etilishi holatini o‘rganish to‘g‘risida”gi qarori ijrosini ta’minlash maqsadida Toshkent shahrida keng qamrovli o‘rganish ishlari olib borildi.

🔍 Xalq deputatlari Toshkent shahar Kengashi deputatlari Habibulla Akilov, Nigora Eshmetova, Aziz Ibragimov, Muxtor Ilhomov hamda tuman Kengashi deputatlari Muqaddas Rahmatillayeva va Dildora Islomovalar hamkorligida Shayxontohur, Uchtepa va Mirzo Ulug‘bek tumanlaridagi 62-, 341-, 451- hamda 418-sonli davlat maktabgacha ta’lim tashkilotlarida o‘rganish ishlari tashkil etildi.

🔎 O‘rganishlar davomida bolalar hayoti va sog‘lig‘ini muhofaza qilish, yong‘in va elektr xavfsizligi, sanitariya-gigiyena talablariga rioya etilishi, oziq-ovqat mahsulotlarini saqlash va tayyorlash holati, ichimlik suvi sifati, tibbiy xizmat ko‘rsatish, evakuatsiya tizimlari hamda muassasalardagi umumiy xavfsizlik choralariga alohida e’tibor qaratildi.

📝 Deputatlar tomonidan savolnoma asosida muassasalardagi mavjud sharoitlar batafsil o‘rganilib, xodimlarning favqulodda holatlarga tayyorgarligi, yong‘in o‘chirish vositalarining ishchi holati, elektr jihozlari xavfsizligi, hududlarning qo‘riqlanish darajasi va bolalar uchun yaratilgan sharoitlar tahlil qilindi.

⚠️ O‘rganishlar natijasida ayrim muassasalarda sport va o‘yin maydonchalarini xavfsizlantirish, sanitariya talablarini yanada kuchaytirish, elektr jihozlarini yangilash, videokuzatuv tizimlarini kengaytirish hamda xodimlar uchun qo‘shimcha tibbiy va xavfsizlik treninglarini tashkil etish zarurligi qayd etildi.

💬 Deputatlar tomonidan muassasa mas’ullariga aniqlangan kamchiliklarni bartaraf etish yuzasidan amaliy tavsiya va ko‘rsatmalar berildi. Shuningdek, ota-onalar va jamoatchilik vakillarini nazorat jarayonlariga keng jalb etish, bolalar xavfsizligi bo‘yicha profilaktik ishlarni muntazam tashkil etish muhimligi ta’kidlandi.

🤝 O‘rganish yakunida deputatlar bolalar hayoti va sog‘lig‘ini himoya qilish jamiyatdagi eng ustuvor vazifalardan biri ekanini qayd etib, bu boradagi jamoatchilik nazoratini yanada kuchaytirish hamda mavjud muammolarni bosqichma-bosqich bartaraf etish yuzasidan tizimli ishlar davom ettirilishini bildirdilar.

📱 Telegram 📱 Instagram 📱 Facebook 📱 YouTube 🔎 E-kengash