AHOLI MUROJAATLARI BILAN ISHLASH SAMARADORLIGI — DOIMIY KOMISSIYA NAZORATIDA
🏛 Xalq deputatlari Pastdarg‘om tumani Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasining 2026-yil 12-oktabrdagi yig‘ilishida aholi murojaatlari bilan ishlash holati tanqidiy-tahliliy muhokama qilindi.
📊 MUROJAATLAR TAHLILI
Tuman Xalq qabulxonasi mudiri D. Mamatqulovning axborotiga ko‘ra, joriy yilning 9 oyi davomida O‘zbekiston Respublikasi Prezidentining Virtual va Xalq qabulxonalariga Pastdarg‘om tumani aholisidan jami 7 083 ta murojaat kelib tushgan.
Shundan 2 212 tasi yoki 35,8 foizi ijobiy hal etilgan. Takroriy murojaatlar soni 1 040 tani tashkil etib, o‘tgan yilning mos davriga nisbatan 212 taga yoki 26 foizga oshgan. Shuningdek, 44 ta jamoaviy murojaatdan atigi 2 tasi ijobiy hal etilgan.
⚠️ Muhokama davomida murojaatlarning takroran kelib tushishi, ayrim masalalarning amalda hal etilmay qolayotgani, jamoaviy murojaatlar bilan ishlashdagi kamchiliklar hamda ayrim mahallalarda muammolarni bartaraf etish darajasi pastligi tanqid qilindi.
Xususan, Bog‘ishamol, Beshbola, Galatut va Furqat mahallalarida murojaatlar mazmunini manzilli o‘rganish, ularning kelib chiqish sabablarini aniqlash va mavjud muammolarni bartaraf etish zarurligi qayd etildi.
✅ MUHOKAMA YAKUNLARI VA VAZIFALAR
Doimiy komissiya qarori bilan quyidagi yo‘nalishlarda ishlarni kuchaytirish tavsiya etildi:
🔹 Aholi murojaatlarini soha, tashkilot va mahallalar kesimida chuqur tahlil qilish;
🔹 Takroriy murojaatlarning kelib chiqish sabablarini aniqlash va ularni bartaraf etish;
🔹 Gaz, elektr energiyasi, ichimlik suvi, ijtimoiy himoya, bandlik, aliment undirish va ichki yo‘llar bilan bog‘liq muammolarni manzilli hal etish;
🔹 Jamoaviy murojaatlarni joyiga chiqqan holda o‘rganish va ko‘tarilgan masalalar yuzasidan amaliy choralar ko‘rish;
🔹 Fuqarolar bilan ochiq muloqotlar va sayyor qabullarni kuchaytirish, muammolarni murojaat kelib tushishidan oldin aniqlash;
🔹 Mas’ul tashkilotlar faoliyati yuzasidan muntazam monitoring olib borish va ijro intizomini mustahkamlash.
📑 Shuningdek, aholi murojaatlari bilan ishlash samaradorligini oshirish bo‘yicha chora-tadbirlar dasturini ishlab chiqish hamda mazkur masalani Xalq deputatlari Pastdarg‘om tumani Kengashining navbatdagi sessiyasida muhokama qilish tavsiya etildi.
🎯 ASOSIY MAQSAD — murojaatlarni shunchaki ko‘rib chiqish emas, balki ularda ko‘tarilgan muammolarni amalda hal etish, fuqarolarning qonuniy manfaatlarini ta’minlash va davlat organlarining aholi oldidagi mas’uliyatini oshirishdir.
Yig‘ilish yakunida doimiy komissiyaning tegishli qarori qabul qilindi. 🇺🇿Rasmiy sahifalarimiz! ✔️