Mazkur vazifalar doirasida Xalq deputatlari Termiz shahar Kengashi raisi, deputat D.Normuradova, Kengash kotibiyati mudiri, deputat A.Ashurov hamda Kengash kotibiyati bosh mutaxassisi R.Mamashukurovlar Kengashining 25-"Kokildorota" saylov okrugi deputati M.Sidiqovaning saylov okrugi hududidagi “Kokildorota” mahallasida profilaktika inspektori faoliyati tahlil qilindi.

O‘rganish jarayonida mahallada jamoat xavfsizligini ta’minlash, huquqbuzarliklarning barvaqt oldini olish, profilaktik hisobda turuvchi shaxslar bilan individual ishlash, muammoli oilalar, yoshlar va ijtimoiy xavfli vaziyatga tushib qolgan fuqarolar bilan manzilli profilaktik tadbirlarni tashkil etish holati ko‘rib chiqildi.

O‘zbekiston Respublikasining “Huquqbuzarliklar profilaktikasi to‘g‘risida”gi O‘RQ–371-son Qonuni huquqbuzarliklarning sabab va shart-sharoitlarini aniqlash hamda ularni bartaraf etishni profilaktikaning muhim yo‘nalishlaridan biri sifatida belgilaydi.

Shu nuqtayi nazardan, mahallada jinoyatchilikning oldini olish faqat huquqbuzarlik sodir etgan shaxs bilan ishlash bilangina cheklanmasdan, ishsizlik, oilaviy nizolar, ijtimoiy muammolar, nazoratsizlik va boshqa xavf omillarini barvaqt aniqlash hamda ularni tegishli tashkilotlar bilan hamkorlikda bartaraf etish asosida tashkil etilishi lozimligi qayd etildi.

O‘zbekiston Respublikasi Prezidentining 2026-yil 5-yanvardagi RP–1-son qarori bilan mahallalarda xavfsiz muhitni yaratish bo‘yicha yaxlit va manzilli ishlash tizimini joriy etishga qaratilgan qo‘shimcha choralar belgilangan. Hujjatda huquqbuzarliklarning barvaqt oldini olish, ijtimoiy profilaktika samaradorligini oshirish va xavf guruhidagi shaxslar bilan manzilli ishlashga alohida e’tibor qaratilgan.

Shuningdek, mahallalarda ijtimoiy profilaktika mahalla raisi, hokim yordamchisi, profilaktika inspektori, yoshlar yetakchisi, xotin-qizlar faoli, ijtimoiy xodim va soliq inspektorining o‘zaro hamkorligi asosida olib borilishi belgilangan.

Shundan kelib chiqib, “Kokildorota” mahallasida profilaktika inspektori faoliyatini baholashda nafaqat huquqbuzarliklar statistikasi, balki aholi bilan manzilli ishlash, muammoli oilalarni aniqlash, ijtimoiy-maishiy muammolarni tegishli tashkilotlarga yo‘naltirish va ularning hal etilishini nazorat qilish masalalariga ham e’tibor qaratildi.

O‘rganish yakunlari bo‘yicha aniqlangan masalalar yuzasidan tegishli tavsiyalar berildi. Profilaktika inspektori faoliyatida manzilli profilaktik chora-tadbirlarni kuchaytirish, jinoyat sodir etilishiga sabab bo‘luvchi omillarni barvaqt aniqlash va ularni bartaraf etish, mahalla raisi hamda “mahalla yettiligi” bilan hamkorlikni yanada mustahkamlash bo‘yicha vazifalar belgilandi.