Xalq deputatlari Qo‘qon shahar Kengashi huzuridagi Tashabbusli budjet loyihalarini tanlab olish ishchi komissiyasining yig‘ilishi bo‘lib o‘tdi.

Yig‘ilishda O‘zbekiston Respublikasi Oliy Majlisi Senati Kengashining 2024-yil 30-yanvardagi KQ-666-IV-son qarori bilan tasdiqlangan “Tashabbusli budjet jarayonlarini o‘tkazish hamda moliyalashtirish tartibi to‘g‘risida”gi Nizom talablari asosida tashabbusli budjet jarayonining navbatdagi bosqichiga oid masalalar muhokama qilindi.

Xususan, fuqarolar tomonidan ilgari surilgan hamda 50 tadan ortiq ovoz to‘plagan 30 ta loyihani Oliy Majlis deputati tashabbusi asosida tanlab olish va ularni g‘olib deb topish masalasi atroflicha ko‘rib chiqildi.

Yig‘ilish davomida loyihalarning belgilangan talablarga muvofiqligi, ularning aholi uchun ijtimoiy ahamiyati hamda hududlarda mavjud muammolarni bartaraf etishga qaratilgani yuzasidan fikr almashildi.

Tashabbusli budjet jarayonlarida fuqarolarning faol ishtirokini ta’minlash, aholining taklif va tashabbuslarini qo‘llab-quvvatlash, mablag‘lardan samarali va maqsadli foydalanish hamda jarayonlarning ochiqligi va shaffofligini ta’minlash muhim vazifalardan biri ekani ta’kidlandi.

Xalq deputatlari Qo‘qon shahar Kengashi