Xalq deputatlari Marg‘ilon shahar Kengashi deputati, 14-Nurafshon saylov okrugi deputati S.Jurayeva tomonidan joriy yilning 25-may kuni shahar hokimi o‘rinbosari nomiga deputatlik so‘rovi yuborilgan edi.

Mazkur deputatlik so‘rovida Nurafshon mahallasidagi yo‘llarning holatini yaxshilash, xususan, muammoli ko‘chalardan birini asfaltlashtirish masalasi ko‘tarilgan. Deputat tomonidan hududdagi mavjud muammo o‘rganilib, uni bartaraf etish yuzasidan tegishli mutasaddilar e’tiboriga yetkazilgan.

Bugungi kunda deputatlik so‘rovida ko‘tarilgan masala amaliy yechimini topib, Nurafshon mahallasida asfaltlashtirish ishlari olib borilmoqda.

Deputat S. Jurayeva hududga chiqib, amalga oshirilayotgan asfaltlashtirish ishlarining borishini shaxsan nazorat qildi. O‘rganish davomida yo‘l qoplamasining sifati, ishlarning belgilangan talablar asosida olib borilishi hamda aholiga qulaylik yaratish masalalariga e’tibor qaratildi.

Mazkur natija deputatlik so‘rovlarining hududlarda mavjud muammolarni aniqlash va ularni amaliy hal etishdagi muhim vosita ekanini yana bir bor ko‘rsatmoqda.

Eng muhimi, saylovchilar tomonidan bildirilgan muammo deputat tashabbusi bilan tegishli tashkilotlarga yetkazilib, bugungi kunda amaliy ishlar bilan davom ettirilmoqda.

Xalq deputatlari Marg‘ilon shahar Kengashi deputatlari tomonidan fuqarolar murojaatlarida ko‘tarilayotgan masalalarni o‘rganish, ularning yechimini topish va ijrosini nazorat qilish ishlari davom ettiriladi.