Joriy yil boshidan “Ayollar daftari”ning 7-bosqichi uchun o‘tkazilgan xatlov natijalariga ko‘ra, mahallada jami 2624 nafar xotin-qiz istiqomat qilishi aniqlangan. Shundan ijtimoiy himoyaga muhtoj 113 nafar xotin-qiz “Ayollar daftari”ga kiritilgan. 

Daftarga kiritilgan xotin-qizlarning muammolarini hal etish bo‘yicha amalga oshirilgan ishlar natijasida 23 nafarining bandligi ta’minlangan, 2 nafar ayolga kredit mablag‘lari ajratilib, tadbirkorlik faoliyatini yo‘lga qo‘yishiga ko‘maklashilgan. Shuningdek, 2 nafar ayolga uy-joyini ta’mirlash uchun moddiy yordam ko‘rsatilgan. 

Xotin-qizlarning ruhiy-emotsional holatini yaxshilash va ularni qo‘llab-quvvatlash maqsadida psixologik yordamga muhtoj 30 nafar ayol bilan trening va amaliy mashg‘ulotlar o‘tkazilgan. Nogironligi bo‘lgan va mehnatga layoqatsiz 20 nafar ayolning tibbiy ko‘rikdan o‘tkazilishi tashkil etilib, ularning salomatligi bilan bog‘liq masalalar
o‘rganilgan. Shuningdek huquqiy yordamga muhtoj 20 nafar xotin-qizga tuman Adliya bo‘limi boshlig‘i Shukurjon Xolmatov tomonidan huquqiy maslahatlar berilgan. Tazyiq va zo‘ravonlikka uchragan 26 nafar ayolga himoya orderlari rasmiylashtirilgani ham o‘rganish davomida aniqlandi. 

O‘rganish yakunida xotin-qizlarning muammolarini o‘z vaqtida aniqlash va manzilli hal etish, “Ayollar daftari”ga kiritilgan fuqarolar bilan individual ishlash, ularning bandligini ta’minlash hamda ijtimoiy va huquqiy himoyasini kuchaytirish yuzasidan mas’ullarga tegishli tavsiya va topshiriqlar berildi. 

Mahalliy Kengash deputatining hududdagi xotin-qizlar faoli faoliyatini o‘rganishi — aholi, ayniqsa, ijtimoiy himoyaga muhtoj xotin-qizlarning muammolarini joyida aniqlash va ularni hal etishda muhim ahamiyat kasb etadi.  

 Xalq deputatlari Uchko‘prik tumani Kengashi