O‘zbekiston Respublikasi Prezidentining PQ-406-son qarori hamda Oliy Majlis Senati Kengashining KQ-35-V-son qarori ijrosini ta’minlash, shuningdek, mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida hududlarda o‘rganish ishlari izchil olib borilmoqda.

Mazkur yo‘nalishdagi navbatdagi o‘rganish Xalq deputatlari Marg‘ilon shahar Kengashi deputati M. Mirzayev tomonidan 15-Zuhro saylov okrugidagi Zuhro mahallasida nuroniylar hamrohligida amalga oshirildi.

O‘rganish davomida ko‘p kvartirali uylar atrofi va ularga tutash hududlarning sanitariya holati, obodonlashtirilishi hamda aholiga qulay va munosib yashash muhitini yaratish masalalariga alohida e’tibor qaratildi.

Xususan, O‘zbekiston Respublikasining 2019-yil 7-noyabrdagi O‘RQ-581-son “Ko‘p kvartirali uylarni boshqarish to‘g‘risida”gi Qonunining 7-moddasida ko‘p kvartirali uyga tutash hududlarning sanitariya holatini saqlash va obodonlashtirish bilan bog‘liq talablar belgilangan.

Mazkur talablarning mazmun-mohiyati faqat xonadonlarning ozodaligini ta’minlash bilangina cheklanmay, umumiy foydalanishdagi hududlarni ham toza, tartibli va obod saqlashni nazarda tutadi. Shu bois ko‘p kvartirali uylar atrofidagi hududlarning holati aholi farovonligi va yashash muhitining muhim ko‘rsatkichlaridan biridir.

O‘rganish davomida aniqlangan masalalar yuzasidan tegishli tashkilotlar bilan hamkorlikda zarur choralarni ko‘rish, hududning sanitariya va obodonlashtirish holatini yaxshilash hamda mavjud kamchiliklarni bartaraf etish bo‘yicha takliflar shakllantirildi.

Deputatning nuroniylar bilan birgalikda hududni o‘rganishi esa mahalladagi masalalarni bevosita aholi fikri va takliflari asosida aniqlash, ularni tegishli tashkilotlar oldiga qo‘yish hamda ijrosini nazorat qilishda muhim ahamiyat kasb etadi.