Sessiya qarori ijrosi yuzasidan “Suvoqova” MCHJ faoliyati o‘rganildi.

Xalq deputatlari Termiz tuman Kengashi deputatlari tomonidan sessiyada qabul qilingan qarorlar ijrosini ta’minlash hamda deputatlik nazoratini amalga oshirish maqsadida Termiz tumani “Suvoqova” MCHJ faoliyati o‘rganildi.

O‘rganish davomida korxona tomonidan aholiga ichimlik suvi yetkazib berish, suv ta’minoti tizimining barqaror ishlashi, mavjud muammolarni bartaraf etish hamda sessiya qarorida belgilangan vazifalarning ijrosi holatiga e’tibor qaratildi.

Shuningdek, hududlarda ichimlik suvi ta’minoti bilan bog‘liq murojaatlar, mavjud kamchiliklar va ularni bartaraf etish bo‘yicha amalga oshirilayotgan ishlar yuzasidan mas’ullar bilan fikr almashildi.

Mazkur o‘rganishda O‘zbekiston Respublikasining “Ichimlik suvi ta’minoti va oqova suvlarni chiqarib yuborish to‘g‘risida”gi Qonuni talablari ijrosiga ham alohida e’tibor qaratildi. Ushbu Qonun Qonunchilik palatasi tomonidan 2021-yil 28-dekabrda qabul qilinib, Senat tomonidan 2022-yil 28-aprelda ma’qullangan.

Qonun ichimlik suvi ta’minoti va oqova suvlarni chiqarib yuborish sohasidagi munosabatlarni tartibga solish, iste’molchilarning huquq va qonuniy manfaatlarini ta’minlash hamda aholiga sifatli ichimlik suvi yetkazib berishga qaratilgan.

Aniqlangan holatlar yuzasidan mas’ullarga tegishli taklif va tavsiyalar berilib, sessiya qarori ijrosi hamda ichimlik suvi ta’minoti sohasidagi qonunchilik talablarining bajarilishi bo‘yicha deputatlik nazorati davom ettirilishi belgilandi.