Deputat fuqarolar bilan ko‘chalarda yurib ochiq muloqot o‘tkazdi

Xalq deputatlari Termiz tuman Kengashi 3-Nurafshon saylov okrugi deputati K. Abdullayeva o‘zi saylangan Bunyodkor MFY hududida fuqarolar bilan ko‘chalarda yurib, ularning murojaat va takliflarini tingladi.

Muloqot davomida aholi tomonidan asosan maishiy chiqindilarni olib chiqib ketish bilan bog‘liq muammo ko‘tarildi. Fuqarolarning ta'kidlashicha, chiqindilarni olib ketish ishlari belgilangan jadval asosida amalga oshirilmayotgani sababli ayrim xonadonlarda maishiy chiqindilar o‘z vaqtida olib ketilmay qolmoqda. Bu esa hududning sanitariya holatiga salbiy ta'sir ko‘rsatmoqda.

Mazkur murojaat deputat tomonidan nazoratga olinib, chiqindilarni belgilangan jadval asosida o‘z vaqtida olib chiqib ketishni ta'minlash yuzasidan mas'ul tashkilotlarga tegishli tartibda murojaat qilish hamda muammoni bartaraf etish bo‘yicha zarur choralar ko‘rilishi belgilandi.

Fuqarolar bilan bevosita joylarda olib borilayotgan bunday uchrashuvlar aholini qiynayotgan muammolarni o‘z vaqtida aniqlash va ularni hal etishda muhim ahamiyat kasb etadi.