Mazkur tadbir korrupsiyaga qarshi kurashish va korrupsion omillarning oldini olish borasida belgilangan “Yo‘l xaritasi” vazifalari ijrosini ta’minlash, savdo kompleksidagi mavjud holatni tahlil qilish, korrupsion xavf va omillarni aniqlash hamda ularning oldini olish bo‘yicha tegishli choralarni belgilash maqsadida tashkil etildi.

Tadbirda viloyat Kengashi deputati G.Kravchenya, viloyat prokurorining katta yordamchisi Sh.Xurramov, Korrupsiyaga qarshi kurashish bo‘yicha Termiz shahar komissiyasi raisi D.Normuradova, komissiya a’zolari, Kengash kotibiyati mudiri A.Ashurov, shahar Kengashining Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi, ekspert guruhi rahbari A.Mustafakulov hamda tegishli mutasaddilar ishtirok etdi.

Nazorat-tahlil davomida savdo kompleksida xizmat ko‘rsatish va tashkiliy jarayonlarda korrupsion omillarning yuzaga kelishiga sabab bo‘lishi mumkin bo‘lgan holatlar atroflicha ko‘rib chiqildi. Xususan, avtoturargoh faoliyatini raqamlashtirish ishlari, situatsion markazi faoliyati, mavjud jarayonlarni monitoring qilish va nazorat mexanizmlari o‘rganildi.

Shuningdek, raqamli texnologiyalardan samarali foydalanish orqali inson omilini kamaytirish, xizmat ko‘rsatish jarayonlarida ochiqlik va shaffoflikni ta’minlash, nazorat imkoniyatlarini kengaytirish hamda korrupsion holatlarning oldini olish masalalariga alohida e’tibor qaratildi.

O‘rganish yakunlari bo‘yicha aniqlangan masalalar yuzasidan mas’ullarga tegishli tavsiya va ko‘rsatmalar berilib, korrupsion xavflarni minimallashtirish, mavjud kamchiliklarni bartaraf etish, raqamlashtirish jarayonlarini takomillashtirish va nazorat mexanizmlarini kuchaytirish bo‘yicha tegishli vazifalar belgilandi.